ՀՀ ԿԳ նախարարության և Մայր աթոռ սուրբ Էջմիածնի նախաձեռնությամբ արդեն 7 տարի է՝ հանրապետությունում իրականացվում է «Լավագույն ուսուցիչ» մրցույթը։
Մանկավարժները նախ մասնակցում են մրցույթի մարզային փուլին, իսկ վերջնական հանրապետական փուլը՝ արդեն հաղթած ուսուցիչների մասնակցությամբ, տեղի է ունենում Երևանում, այս տարի՝ Կրթության ազգային ինստիտուտում։
ԿԳ նախարարության համապատասխան մասնագետներից տեղեկացանք, որ այս տարի մրցույթին մասնակցում են նաև դասվարները։
«Առաջին լրատվական»-ի հետ զրույցում Մայր աթոռ սուրբ Էջմիածնի քրիստոնեական դաստիարակության կենտրոնի տնօրեն հայր Վարդան աբեղա Նավասարդյանը, կարևորելով նման մրցույթների անցկացումը, նշեց.
«Մենք նպատակ ունենք դպրոցներում քաջալերել լավ մանկավարժներին, ոգևորել, ներշնչել, որպեսզի մասնագիտական կարողությունները և հմտությունները ավելի զորացնեն»։
Մրցույթին մասնակցող մանկավարժները ևս մեզ հետ զրույցում նշեցին, որ սիրով են մասնակցում, քանի որ կարծում են, որ նման մրցույթների՝ «առողջ մրցակցությունը կնպաստի, որ մանկավարժները չդոփեն տեղում»։
Ավելացնենք, որ հաղթող ուսուցիչներին սպասվում են դրամական պարգևներ։