Երեկ ԱԺ լիագումար նիստում ելույթ ունենալով պետական բյուջեի նախագծի ներկայացման կապակցությամբ` ՀՀ վարչապետ Տիգրան Սարգսյանը ուշագրավ հայտարարությոն է արել: Նա ասել է, թե 2011 թվականի վերջում Հայաստանի արտաքին պետական պարտքը կկազմի 4.3 մլն դոլար: «Դեֆիցիտը հիմնականում կֆինանսավորվի փոխառու միջոցներով, ներքին և արտաքին ռեսուրսների հաշվին, ընդ որում` 86.8 տոկոսը բաժին կընկնի արտաքին պարտքին և 2011 թվականի վերջում կանխատեսում ենք ունենալ 4305.1 մլն ԱՄՆ դոլարի չափով արտաքին պարտք»,- ասել է վարչապետը: Սակայն նշենք, որ կառավարության կողմից հուլիսին հաստատված «ՀՀ կառավարության պարտքի կառավարման 2011-2013 թթ. ռազմավարական ծրագրով» 2011 թ. վերջին ողջ արտաքին պետական պարտքը նախատեսված է 3.8 մլրդ դոլար: Եվ դեռևս մի ամիս առաջ ֆինանսների նախարարը նշում էր, որ այդ ծրագրի մեջ ներկայացված թվերը չեն փոփոխվելու, քանի որ այդ ծրագրում հաշվարկված վարկային միջոցներից բացի այլ վարկեր Հայաստանը չի վերցնելու:
