Այսօր «Ազատություն» ռադիոկայանի հետ զրույցում Հանրապետական կուսակցության փոխնախագահ, ԱԺ Հանրապետական խմբակցության ղեկավար Գալուստ Սահակյանն ասել է.
«Չի կարող պատահել, որ երբ որևէ խնդիր են առաջացնում քաղաքական ուժերը՝ նախագահը չպատասխանի», – հավելելով. – «Չունենք որևէ առիթ մտածելու, որ նախագահը չի անդրադառնա դրան»:
«Ազատություն» ռադիոկայանի ճշտող հարցին՝ արդյոք այդ անդրադարձը կլինի այսօր, կամ վաղը, Հանրապետականի փոխնախագահը դրական պատասխան տվեց:
Մայիսի 31-ին հրավիրած վերջին հանրահավաքում Հայ ազգային կոնգրեսի առաջնորդ Լևոն Տեր-Պետրոսյանը հայտարարել էր, որ ՀԱԿ-ը պատրաստ է երկխոսության:
Ընդդիմադիր առաջնորդի այս հայտարարությանը հաջորդեց երկխոսության համար ձևավորված պատվիրակության կազմավորումը:
Ընդդիմությունը նաև հայտարարել է, որ բանակցությունների օրակարգը մեկն է՝ արտահերթ նախագահական և խորհրդարանական ընտրությունների անցկացումը, մինչդեռ իշխանությունը պատասխանել է, որ այդ հարցի շուրջ չեն բանակցելու:
Այսօր, սակայն, Գալուստ Սահակյանն ասաց, թե տեխնիկական հարցերը, այդ թվում՝ օրակարգի ձևավորումը, լուծելի խնդիրներ են:
«Շատ դրական ենք համարում, որ ՀԱԿ-ը փորձում է երկխոսություն կազմակերպել: Մենք բոլորս պատրաստ ենք դրան: Տեխնիկական խնդիրները, եթե ցանկություն կա, դրանք լուծելի են», – պարզաբանեց Հանրապետականի փոխնախագահը:
