ՀՀ ԱԺ պատգամավոր Շիրակ Թորոսյանը այսօր հրավիրված մամուլի ասուլիսի ժամանակ մեկնաբանեց Ամենայն Հայոց կաթողիկոս Գարեգին Բ-ի՝ օրերս Վրաստան կատարած այցը։ Շիրակ Թորոսյանը կաթողիկոսի այցը Վրաստան համարում է պատմական, քանի որ 1905 թվից ի վեր սա Հայոց կաթողիկոսի առաջին հայրապետական այցն էր Վրաստան։ Թորոսյանը այցը կարևոր է համարում նաև այն նշանակության համար, որ այցն ունեցավ վրացահայ համայնքի հոգևոր կարիքները լուծելու հարցումը։
«Այցը ոգևորիչ էր վրացահայ համայնքի և հատկապես ջավախահայության համար։ Բարձր եմ գնահատում վեհափառի հորդորները՝ ապրել հայեցի և իրենց երեխաներին սովորեցնել ոսկեղենիկ հայերենը»։
Շիրակ Թորոսյանի համար զամանալի էր կոմյունիկեի մասին տեղեկությունը, որ տարածել են վրացական լրատվամիջոցները։ «Այդ կոմյունիկեի տեքստից երևում է, որ վրացական կողմը փորձում է արհեստական կերպով խոչընդոտել օրակարգային հարցերի քննարկումը։ Այդ հարցերն են՝ նախ Հայ Առաքելական եկեղեցու վրացահայ թեմին իրավական կարգավիճակ շնորհելը, և երկրորդ՝ վիճելի եկեղեցիների խնդիրը»,- ասում է Շիրակ Թորոսյանը։
Ըստ ԱԺ պատգամավորի՝ օրինական ոչ մի հիմք չունեն կոմյունիկեում առաջարկված դրույթները։ Թորոսյանը մեկնաբանեց նաև այն առաջարկը, որ Վրաստանի հայկական եկեղեցիներին նույն կարգավիճակը պետք է տալ, ինչ վրացական եկեղեցիներն ունեն Հայաստանում։ Ըստ Թորոսյանի՝ այս երկու խնդիրները համեմատելի չեն, քանի որ Հայաստանում գրեթե չկա վրացական համայնք, մինչդեռ Վրաստանում ապրում են մի քանի հարյուր հազար հայեր՝ 150,000-ը ապրում են իրենց պատմական հայրենիքում։ Բացի այդ, վրացական եկեղեցին գրանցում ստանալու հարցով երբեք չի դիմել Հայաստանին, որը ոչ մի խնդիր չունի կրոնական կազմակերպությունների գրանցման հետ կապված։
Շիրակ Թորոսյանը անդրադարձավ նաև եկեղեցիների պատկանելությունը ճշտելու համար պատմական հանձնաժողով ստեղծելու առաջարկին՝ համեմատելով այն հայ-թուրքական հարաբերությունների կարգավորման համար պատմական հանձնաժողովի ստեղծման գաղափարի հետ։ «Հանձնաժողովի ստեղծումը ցույց կտա, որ մենք կասկածի տակ ենք դնում մեր եկեղեցիների պատկանելությունը»։
Եզրափակելով թեման՝ Թորոսյանը կարծիք է հայտնում, որ հայկական իշխանությունները ավելի խիստը քաղաքականություն պետք է վարեն վրացի հարևանների հետ։