Պոլսի ծանր հանցագործությունների 14-րդ դատարանում դեկտեմբերի 3-ին տեղի է ունեցել «Ակօս»-ի խմբագրապետ Հրանտ Դինքի սպանության՝ վերսկսված դատավարության նոր նիստը: Ըստ Radikal-ի՝ տեղի են ունեցել ուշագրավ զարգացումներ. սպանության հրահրողներից Էրհան Թունջելը հիմնական մեղքը բարդել է ոստիկանության վրա` հայտարարելով. «Մեր դիմաց կանգնածը ոչ թե ոստիկանություն է, այլ հրոսակախումբ»: Այս մասին տեղեկացնում է ֆրանսիական «Յառաջ» պարբերականը:
Թունջելը, մասնավորապես, որպես սպանության գլխավոր կազմակերպիչ մատնանշել է Տրապիզոնի Ապահովության ծառայության ռազմավարական վարչության նախկին պետ Ռամազան Աքեյուրեքին: «Նրանք հանցագործ խմբակցության անդամներ են, սակայն հաջողել են խույս տալ՝ ինձ դարձնելով թիվ մեկ մեղադրյալը»,- ասել է Թունջեը:
Նա այս անգամ էլ չի նշել շոշափելի որևէ հանցագործ կազմակերպության անուն` կրկնելով նախապես արած հայտարարությունը, թե Դինքի սպանության գործում ներգրավված է «Էրգենեքոն»-ից ավելի ազդեցիկ կառույց` ընդգծելով, որ այն ո՛չ կառավարությունն է, ո՛չ էլ հայտնի կրոնապետ Ֆեթհուլլահ Գյուլենի համայնքը: Սակայն ավելացրել է, որ պետությունը աշխատավարձ է տալիս այդ հրոսակախմբի անդամներին:
Իր ամբողջ ելույթի ընթացքում Թունջելը փորձել է արդարացնել իրեն` պնդելով, որ ինքը Հրանտ Դինքի սպանության հետ որևէ կապ չունի, ընդհակառակը` փորձել է կանխել, և կարելի է իրեն միայն որպես վկա ներգրավել:
Դատավարության ընթացքում Հրանտ Դինքի ընկերները Պոլսի Արդարադատության պալատի շենքի առջև ցույց էին կազմակերպել:
