Շատ լավ իրավիճակ է ստեղծվել, որ նոր կառավարությունը խորհրդարանում մեծամասնություն չունի և կա մրցակցություն, լավ կլիներ, որ լինեին մի քանի բևեռներ ևս՝ միմյանց զսպելու համար: – «Առաջին լրատվական»- ի հետ զրույցում այս կարծիքը հայտնեց քաղաքագետ Ստեփան Դանիելյան: Նրա խոսքով՝ երբ քաղաքական դաշտում հավասարակշռություն է ձևավորվում, հանրությունն ավելի մեծ դեր է կատարում:
Քաղաքագետի դիտարկմամբ՝ տեղի ունեցածը իշխանափոխություն էր. «Հեղափոխությունը արժեքային համակարգի, մտածողության փոփոխություն է: «Իմ կարծիքով հեղափոխություն դեռևս չի եղել: Հույս ունեմ հեղափոխության ճանապարհին ենք: Այն չի իրագործվի, եթե գործող իշխանությունը կատարի սխալներ, որից կօգտվեն խորհրդարանում մեծամասնություն ունեցող ուժերը և նրանք կկարողանան վերադառնալ իշխանության միայն այն ժամանակ, երբ հանրությունը հիասթափվի այս իշխանությունից: Այս կառավարությունը օդի մեջ է, ոտքեր չունի խորհրդարանում, դեռևս իր ինստիտուտները չունի, բայց ունի հանրային աջակցություն: Եթե հանրային աջակցությունը կորցնի, իշխանության կորուստը տեխնիկայի հարց է»:
Ս. Դանիելյանի դիտարկմամբ՝ կուսակցական կառավարություն է ձևավորվել, որը շատ սխալ է: Նրա խոսքով՝ եղել է հանրային համերաշխություն կոնկրետ խնդիր իրականացնելու համար, բայց չկան բաց հանրային քննարկումներ: «Ցանկացած հանրություն պետք է արդարության որոշակի մեխանիզմների վրա հենվի, մենք դա չենք տեսնում»,- նշեց քաղքագետը:
Անդրադառնալով դիտարկմանը, որ ներկա կառավարությունը կարծես թե որոշել է արտաքին քաղաքական լուրջ փոփոխություններ չհռչակել, քաղաքագետը նշեց, որ դա ճիշտ մոտեցում է. «Եթե Ռուսաստանը մտահոգությունն ունենար, որ այստեղ աշխարհաքաղաքական փոփոխություն է լինում, կստանայինք արյուն, իսկ երկրորդ կողմը՝ Արևմուտքը Հայաստանից նման պահանջ չունի, նրանց պահանջը մեկն է՝ ժողովրդի մակարդակը փոխվել է. իրենց պետք է Հայաստան, որը կկայանա որպես սուվերեն միավոր, այսինքն՝ ժողովուրդը ձևավորի իր իշխանությունը, և օրինակը լինի վարակիչ: