Հունիսի 20-ին մեկնարկում է ԵԽԽՎ ամառային նստաշրջանը: Այն հետաքրքիր է այնքանով, որ նստաշրջանին ելույթ է ունենալու նաև Սերժ Սարգսյանը: Նա պետք է լավ պատրաստվի ԵԽԽՎ նստաշրջանից առաջ, քանզի ինչպես Հայաստանն է մոնիտորինգի տակ, այնպես էլ նա է լինելու Վեհաժողովի պատգամավորների խիստ մոնիտորինգի տակ:
Եթե նկատի ունենանք նաև ԱԺ «Ժառանգություն» խմբակցության պատգամավոր, հայաստանյան պատվիրակության անդամ Զարուհի Փոստանջյանի ակտիվ գործունեությունը, կարելի է ասել, որ ԵԽԽՎ-ում Սերժ Սարգսյանի համար թեժ ամառն ապահովված կլինի: Սերժ Սարգսյանի ելույթը նախատեսված է հունիսի 22-ին, և արդեն իսկ թուրք և ադրբեջանցի պատգամավորները հերթագրվել են նրան հարցեր տալու համար:
Հիշեցնենք, որ Հայաստանի ԵԽ-ին անդամակցության ողջ ընթացքում ՀՀ նախագահը ԵԽԽՎ-ում մինչ այս մեկ անգամ է ելույթ ունեցել` 2004թ.-ի հունիսին: 2004թ. հետո շատ իրադարձություններ են տեղի ունեցել Հայաստանում, որոնք ԵԽԽՎ կողմից քննադատվել են, տարբեր զեկույցներ են եղել դրանց ուղղությամբ, ու այժմ Սերժ Սարգսյանը պետք է մի շարք հարցերի պատասխաններ տա: Նրան հարցեր տալու համար հերթագրվել է նաև ԱԺ «Ժառանգություն» խմբակցության պատգամավոր Զարուհի Փոստանջյանը: Նա մեզ հետ զրույցում նշեց, որ ԵԽԽՎ ամառային նստաշրջանի ընթացքում Սերժ Սարգսյանին շատ խիստ քննություն է սպասվում. «Նա պետք է պատրաստ լինի տարբեր հարցադրումների, նաև սուր հարցեր կլինեն, և դրանց ինքը պետք է պատասխան ունենա»: Նշենք, որ Զարուհի Փոստանջյանը նաև Եվրոպայի ժողովրդական կուսակցության ԵԽ խմբակցության անդամ է և իր գործընկերներին նամակներ է ուղարկել Հայաստանի իրավիճակի վերաբերյալ, որոնք նույնպես պատրաստվում են հարցեր ուղղել Սերժ Սարգսյանին: Փոստանջյանը նկատեց, որ նրանք բոլորն էլ տեղյակ են Հայաստանում առկա իրավիճակից և այդ տեղեկատվությունը ստանում են ոչ միայն իրենց արտգործնախարարությունից, այլ նաև ուշադիր են ԵԽԽՎ անդամ երկրում տեղի ունեցող իրադարձությունների հանդեպ:
ԵԽԽՎ ամառային նստաշրջանի ընթացքում անդրադարձ է լինելու Թունիսի դեպքերին, որոնց վերաբերյալ զեկույց է լինելու, որին Զարուհի Փոստանջյանը հերթագրվել է ելույթ ունենալու համար: Պատգամավորը ելույթների համար հերթագրվել է նաև «Ազգային խորհրդարանները` որպես մարդու իրավունքների երաշխավոր» քննարկմանը և ԵԽ Մոնիտորինգի հանձնաժողովի զեկույցին, որը վերաբերում է այն հարցին, թե արդյո՞ք տեղի է ունեցել տեղաշարժ անդամ պետություններում, այդ թվում` նաև մոնիտորինգի տակ գտնվող պետություններում: Զարուհի Փոստանջյանի խոսքերով, ԵԽ Մոնիտորինգի հանձնաժողովի զեկույցում անդրադարձ է կատարվելու նաև Հայաստանին, մասնավորապես կքննարկվի, թե արդյո՞ք մեր երկրում առաջընթաց գրանցվել է պարտավորությունների կատարման ուղղությամբ: Պարտադիր կարգով անդրադարձ է լինելու նաև 2008թ. մարտի 1-ի դեպքերին: Նկատենք, որ բացի Մոնիտորինգի հանձնաժողովից, Հայաստանի հարցը ԵԽԽՎ ամառային նստաշրջանի լիագումար նիստում ընդգրկված չէ, և ըստ Փոստանջյանի` այդ հարցը կքննարկվի աշնանային նստաշրջանում, երբ համապատասխան զեկույց կներկայացնեն նաև Հայաստանի հարցով համազեկուցողները:
Այդուամենայնիվ, հայկական էլեկտրոնային լրատվամիջոցների ներկայիս վիճակի վերաբերյալ ԵԽ գիտության, կրթության, մշակույթի և լրատվամիջոցների մշտական հանձնաժողովում քննարկում լինելու է: Զարուհի Փոստանջյանը նշեց, որ հենց ինքն է ներկայացնելու զեկույց հայաստանյան էլեկտրոնային լրատվամիջոցների ազատության վերաբերյալ, որն ըստ երևույթին կընդունվի և կքննարկվի աշնանային նստաշրջանի լիագումար նիստի ընթացքում:
ԵԽԽՎ ամառային նստաշրջանը կավարտվի հունիսի 24-ին: