Ռուսաստանի նախագահի՝ Հայաստան կատարած այցը չի վրիպել թուրքական մամուլի ուշադրությունից, ավելին` այն լայնորեն և ընդհանուր առմամբ չափազանցված է մեկնաբանվել որոշ լրատվամիջոցների կողմից: Այս մասին տեղեկացնում է ֆրանսիական «Յառաջ» պարբերականը:
Մինչ Cihan և IHA գործակալությունները և դրանք մեջբերող մյուս աղբյուրները ընդգծում էին Երևանում Պուտինի դեմ տեղի ունեցած բողոքի ցույցերը, Zaman օրաթերթում, բացի բուն տեղեկատվությունից, տեղ էր գտել նաև սյունակագիր Ֆիքրետ Էրտանի «Պուտինը Գյումրիում» հոդվածը: Էրտանի հոդվածի հիմքում Գյումրիում տեղակայված ռուսական 102-րդ ռազմաբազա կատարված այցելությունն է և Գյումրիի` հայ-թուրքական սահմանին գտնվելու պարագան: Սյունակագիրը չափազանցված է ներկայացնում ռուսական այդ բազայում գտնվող զինվորների թիվւը:
«Պուտինի այցելությունը Գյումրի, որը մեր քթի տակ է, կարևոր է Թուրքիայի համար: Դրանով, անկասկած, Ռուսաստանի նախագահը մեկ անգամ ևս ընդգծում է հայ-ռուսական ռազմական գործակցությունը, շեշտում դրա կարևորությւնը՝ մեկ անգամ ևս հիշեցնելու համար, որ Հայաստանի ապահովությունը Ռուսաստանի երաշխավորության ներքո է»,- գրում է Zaman-ի սյունակագիրը՝ այն համոզմունքը հայտնելով, որ այդ հանդիպումը գրեթե չի մեկնաբանվել հայկական կամ ռուսական լրատվամիջոցների կողմից, ինչը, իհարկե, իրականությանը չի համապատասխանում:
Հոդվածագիրը հիշեցնում է վերջերս 102-րդ ռազմակայանի հրամանատար Անդրեյ Ռուզինսկիի հայտարարությունը, ինչը հերքվեց Ռուսաստանի կողմից: Նա ասել էր, թե Գյումրիի այդ ռազմակայանը Լեռնային Ղարաբաղի վրա Ադրբեջանի հարձակման դեպքում կմիջամտի ռազմական գործողություններին՝ հայտնելով այն կարծիքը, թե ռուսական այդ խարիսխը ոչ միայն Ադրբեջանի, այլև Թուրքիայի դեմ է և նրան սթափեցնելու նպատակ ունի:
Պուտինի` Գյումրիի ռուսական ռազմաբազա կատարած այս այցելությունը և Ռուսաստանի՝ Հարավային Կովկասից չհեռանալու մտադրության մասին հայտարարությունը մտահոգել են թուրքական մամուլին: Թուրքերը մեկնաբանում են՝ «եթե հայերի հետ խնդիր ունենանք, խնդիր կունենանք նաև ռուսների հետ»: