Չենք կարող ասել, թե նախկին իշխանությունը սիրում էր երկիրը, ինչը որ արվում էր, արվում էր մի խմբի հարստացման համար, նրանք դրամանիշներ էին սիրում: «Առաջին լրատվական»- ի հետ զրույցում այս մասին ասաց գրող, սցենարիստ Վահրամ Մարտիրոսյանը:
«Սա հնարավորությունների Հայաստան է: Կարող են լինել իրավիճակներ, որոնք տագնապալի, հուսահատեցնող կթվան, բայց պետք է լինել ամուր և խնդիրները լուծել դրանց ծագման հաջորդականությամբ»,- նշեց մեր զրուցակիցը՝ հավելելով, որ պետք է արժանանանք այս նվերին, որ պարգևեց մեզ շարժման առաջնորդը:
«Այսօր անարյուն, բաց ձեռքերի հեղափոխություն է տեղի ունեցել, և դա բոլորիս ձեռքբերումն է: Մեր բոլոր նախորդ հեղափոխության փորձերն էլ են եղել բաց ձեռքերի՝ պարով, երգով, նույն կոչերով՝ «ոստիկանը մերն է», ագրեսիա չի եղել, չհաշված ՊՊԾ գնդի դեպքը, որի պատճառը վարչախմբի կողմից հետևողականորեն հանրության պահանջների անտեսումն էր:
Այս ժողովուրդը պատրաստ է ապրել օրենքով, եթե իշխանությունը խաղի կանոններ սահմանի: Մենք մեր էությամբ օրինավոր ենք և խաղաղ ենք տրամադրված երկրի ներսում: Եթե կա համապատասխան իշխանություն, մեր վարքն էլ լինելու է խաղաղ»,- ընդգծեց Վ. Մարտիրոսյանը:
Հարցազրույցն ամբողջությամբ՝ տեսանյութում: