«Երկիր»-ը գրում է, որ արդեն մի քանի ամիս է՝ «Իկար» ՍՊԸ–ն դիմել է Հայաստանի բնապահպանության նախարարություն՝ թույլտվություն խնդրելով Գնիշիկ բնապատմական արգելոցի տարածքում՝ Նորավանքից ոչ հեռու գտնվող Մագելի քարանձավի սկզբնամասում այցելուների կենտրոն կառուցելու համար. «Ինչպես սովորաբար լինում է մեր երկրում, հնարավոր է՝ այն հետագայում սպասարկման կենտրոն, խանութ կամ սրճարան դառնա։ Ավելի քան 2 կմ խորությամբ այդ կարստային քարանձավում, որի նմանը Կովկասում չկա (այստեղ ջերմաստիճանը մշտապես +14 է), մինչ օրս շինարարական ոչ մի աշխատանք չի իրականացված՝ զբոսաշրջային նկատառումներից ելնելով»։
Թերթի հետ զրույցում բնապահպանները հայտնել են, որ վերոհիշյալ նախագծի վերաբերյալ բնապահպանության նախարարությունը, «Իկար» ՍՊԸ–ն և նախագծի հեղինակ Սմբատ Դավթյանը փետրվարի 18-ին, Արենիում, հասարակական լսումներ էին անցկացրել, որոնց ընթացքում բացասական արձագանքներ էին հնչել։ Թերթի տեղեկություններով՝ ավելի ուշ, նախարարությունը, այնուամենայնիվ, նախագծի հետ կապված, գաղտնի հավաք է կազմակերպել։
Թերթի հարցին ի պատասխան՝ բնապահպանության նախարարի մամուլի քարտուղար Հասմիկ Մկրտչյանը ոչ միայն հերքել է գաղտնի լսում կազմակերպելու փաստը, այլև այն, որ ընդհանրապես նման ծրագիր է ներկայացված եղել, մոռանալով, որ լսումներին ներկա են եղել նաև բնապահպանները։
«Ի դեպ, հետաքրքիրն այն է, որ Գնիշիկ արգելոցը, որը ստեղծվել է 1980-ականներին, մշակույթի նախարարության ենթակայության տակ է և ո՛չ տնօրեն ունի, ո՛չ էլ պահակ։ Ընդ որում՝ արգելոցում, բացի Մագելի քարանձավից, էլի մեծ քարանձավներ կան՝ Մոզրովի և Արջերի»,- հավելում է թերթը։
