Abkhazeti.info կայքի փոխանցմամբ՝ 2011 թվականի մայիսի 29-ին մոսկովյան թիվ 83 հիվանդանոցում մահացել է Աբխազիայի նախագահ Սերգեյ Բագափշը։ Այնտեղ նրա աջ թոքը վիրահատել էին ֆրանսիացի վիրաբույժ Ժիլբեր Մասարն ու նրա ռուս գործընկեր Նիկոլայ Ուրազովսկին։
Վիրահատությունից հետո բժիշկները պնդում էին, որ նրա կյանքին վտանգ չի սպառնում, ինչի համար էլ վերակենդանացման բաժնից փոխադրել էին սովորական պալատ։ Սակայն երեք օր անց նրա առողջական վիճակն այնքան վատթարացավ, որ նրան փոխադրեցին վերակենդանացման բաժին, ուր և միացրին արհեստական շնչառության սարքը։
Այս կապակցությամբ Կովկասի հարցերով վրացի փորձագետ Մամուկա Արեշիձեն նշում է. «Հուսալի աղբյուրներից տեղյակ եմ, որ ոչ վաղ անցյալում Սերգեյ Բագափշը ողնաշարի բուժման համար գտնվել է Թուրքիայում։ Վերադառնալուց հետո նրան խորհուրդ են տվել բուժվել Գերմանիայում, սակայն նրան չի հաջողվել անցագիր ստանալ։ Ապա ընտրությունը կանգ է առել Իսրայելի վրա։
Վերջնարդյունքում ամեն ինչ վճռել է ռուսական հատուկ ծառայությունների ղեկավար Սերգեյ Պատրուշևի հեռախոսազանգը։ Ինչպես ասում են Բագափշի ընտանիքի անդամները, Պուտինի հանձնարարականով Պատրուշևը զանգահարել է նրան և առաջարկել բուժում ստանալ ռուսական հատուկ ծառայությունների կլինիկայում։
Ինչպես հայտնում են Աբխազիայից, Բագափշը, սակայն, չի այրվել այդ կլինիկայում վիրահատության ենթարկվելու ցանկությամբ, սակայն նրան համոզել են հետազոտվել այնտեղ։ Մոսկվա ժամանալուց հետո նա հայտնվում է վիրահատական սեղանին։ Բագափշի կինն ավելի ուշ է ժամանում Մոսկվա, քանի որ չէր սպասում, թե ամուսնուն կվիրահատեն։
Նա նշում է, որ երբ իր ամուսնուն հանեցին վիրահատարանից, նրա դրությունը նորմալ էր, նա անգամ ոտքի է կանգնել և ընդունել ինչ-որ մեկին։ Հետո նրա մոտ է մտել բուժքույրը և ասել, որ վերականգնման գործընթացն արագացնելու համար իրեն հանձնարարել են թթվածնային դիմակ հագցնել։
Դրանից վայրկյաններ անց Բագափշի մոտ ցնցումներ են սկսվել։ Բագափշի կինն ամուսնու դեմքից հանել է դիմակը, որտեղից այնպիսի տաք օդ է հորդել, որ այրել է Բագափշի կնոջ ձեռքը։ Թթվածնի փոխարեն այն տաք օդ է մատակարարել։
Ինչպես պնդում են Բագափշի ընտանիքի անդամները, թոքերի քաղցկեղը կապ չունի նրա մահվան հետ։ Սուխումում համարում են, որ Բագափշին սպանել են»։