Հայաստանի սոցիոլոգների միության նախագահ Գևորգ Պողոսյանից այսօր հետաքրքրվեցինք, թե «Ազատ դեմոկրատներ» նորաստեղծ կուսակցությունը Հայաստանի քաղաքական դաշտում իրավիճակ փոխելու շանսեր ունի՞, թե՞ ոչ: Դրան ի պատասխան Գևորգ Պողոսյանը արձագանքեց, որ նախ չգիտի, թե հին ՀՀՇ-ականներից ինչքանով նոր դեմոկրատներ կստացվեն: «Դա դեռ մեծ հարց է: Հետևաբար դժվար է ինչ-որ դատողություններ անելը, որովհետև ներքաղաքական դաշտը այնքան կարծրացած է, որ որևէ փոփոխություն մտցնելու համար շատ լուրջ ռեսուրսներ են պետք: Խոսքը մարդկային ռեսուրսների մասին է:
Ավելին, «Ազատ դեմոկրատները» կոնկրետ առաջնորդի խնդիր ունեն, որովհետև մեր ընտրողը այնքան ծրագրերին չի նայում, որքան որ առաջնորդի կերպարին: Այսինքն՝ մեր ընտրողները, որպես կանոն, առաջնորդին նայելով են կուսակցությանը երկրպագում: Իսկ նոր դեմոկրատները իմ կարծիքով դեռևս առաջնորդի խնդիր ունեն»,- ավելացրեց Գևորգ Պողոսյանը:
