ԱԺ «Ժառանգություն» խմբակցության ղեկավար, Եվրանեսթում հայկական պատվիրակության անդամ Ստեփան Սաֆարյանն «Առաջին լրատվականի» հետ զրույցում նշեց, որ եթե անգամ Եվրանեսթի ԽՎ-ն մերժի աշնանային լիագումար նիստը Հայաստանում անցկացնելու առաջարկը, ապա դրանում ողբերգական որևէ բան չկա:
«Եթե մերժեն Երևանում նիստ անցկացնելու առաջարկը, ապա դա կնշանակի, որ Բաքուն նույնպես դուրս է մնալու հետագայում նիստեր անցկացնելիք երկրների ցուցակից»,- մանրամասնեց Սաֆարյանը:
Սաֆարյանի խոսքերով, եթե ընթացք տրվի Բաքվի ներկայացրած առարկություններին, ապա, բնականաբար, հաջորդ պահին Երևանը ևս կարող է ներկայացնել առարկություններ, ինչն իհարկե լավ չէ` ոչ միայն Հայաստանի, այլև Ադրբեջանի համար:
Սաֆարյանը նկատեց, որ շատ հնարավոր է, որ ադրբեջանական կողմի ներկայացրած առարկությունները լինեն անէական: Նրա գնահատմամբ, անգամ կոնֆլիկտի վրա հղումը հիմնավոր փաստարկ չէ. «Ինչպիսի փաստարկ էլ որ բերեն ադրբեջանցիները, անէական է` սկսած նրանից, որ չլուծված ԼՂ կոնֆլիկտ կա, որ իրենք տարածքների խնդիր ունեն, միևնույն է, Եվրանեսթը հակամարտություններ լուծելու կոչված կառույց չէ, և չլուծված հակամարտությունը որևէ կերպ չպիտի դեր խաղաղ նրա լիագումար նիստերի անցկացման վայրի ընտրության վրա»:
Այդուամենայնիվ, Սաֆարյանը նշեց, որ ինքը չի կարծում, որ Եվրանեսթում թույլ կտան, որպեսզի նիստերը վերածվեն ԼՂ հակամարտությունը քննարկելու հարթակի. «Եվրանեսթը Եվրամիության և տվյալ երկրի հարաբերությունների խորացման հարթակ է: Իհարկե, շատ լավ կլինի, որպեսզի լավ հարևանության խնդիրները ևս լուծվեն, բայց եթե անգամ դա չստացվի, Եվրանեսթն ունի իր առավելությունն ու գրավչությունը Հայաստանի համար»: