Ռուսաստանի կառավարությունն իր առջև հավակնոտ խնդիր է դրել՝ 10 տարիների ընթացքում երկիրը դասել աշխարհի 5 խոշորագույն տնտեսությունների շարքին:
Այս մասին Ժնևում հայտարարել է Ռուսաստանի վարչապետ Վլադիմիր Պուտինը: Միաժամանակ պլանավորվում է մեկ անձին բաժին հասնող ՀՆԱ-ն 19,7 հազար դոլարից դարձնել 35 հազար դոլար: Այս մասին հաղորդում է RIA-Novosti գործակալությունը:
«Այս նպատակներին հասնելու համար նախ և առաջ անհրաժեշտ է բարձրացնել աշխատանքի արտադրողականությունը, իսկ ոչ հումքային բարձրտեխնոլոգիական ոլորտներում՝ 3-4 անգամ»,- նշել է նշել է Պուտինը աշխատանքի միջազգային համաժողովի ժամանակ:
ՌԴ կառավարության ղեկավարը նշել է, որ ռուսական տնտեսությունից պետք է դուրս մղվի ոչ արդյունավետ զբաղվածությունը, իսկ դրա փոխարեն պետք է ստեղծվեն 25 մլն-ից ավելի ժամանակակից բարձր վարձատրվող աշխատատեղեր: Հաշվի առնելով, որ հիմա ՌԴ տնտեսությունում զբաղված է մոտավորապես 70 մլն մարդ, արդիականացման տակ պետք է ընկնի ամեն 3-րդ աշխատատեղը:
Միևնույն ժամանակ նա ընդգծել է, որ ՌԴ-ն հետ չի կանգնի իր հասած սոցիալական մակարդակի երաշխիքներից, և ՌԴ կառավարությունը չի թույլատրի, օրինակ, որ 40-ժամյա աշխատանքային շաբաթը մեծանա: Միևնույն ժամանակ վարչապետը խոստացել է խնայողություն չանել արտադրության անվտանգության և էկոլոգիական ստանդարտների վրա:
Վ. Պուտինը նաև նշել է, որ ՌԴ տնտեսությունը ամբողջությամբ դուրս կգա համաշխարհային տնտեսական ճգնաժամի ազդեցությունից 2011 թ. վերջերին և 2012 թ. սկզբին: «Սակայն մենք հիմա արդեն աշխատում ենք հետճգնաժամային զարգացման երկարաժամկետ պլանների և մարտավարության ուղղությամբ»,- ընդգծել է վարչապետը:
