Սեպտեմբերին մեր անկախության 20-ամյակն է, և Եվրանեսթի մեր պատվիրակությունը պաշտոնապես դիմել էր Եվրանեսթի Բյուրոյին՝ առաջարկելով նիստերից մեկն անցկացնել Հայաստանում, ինչին անմիջապես հետևել էր ադրբեջանական կողմի հիստերիկ պատասխանը իրենց անհեթեթ ձևակերպումներով, թե ինչպես կարելի է թույլ տալ դա, քանի որ հենց անկախության տարիների ընթացքում է Հայաստանն «օկուպացրել» ադրբեջանական տարածքները, կրկին իրենց 20 տոկոս տարածքների մասին հիմարություններն են պատմել»,- «Առաջին լրատվականի» հետ զրույցում, անդրադառնալով Եվրանեսթի աշնանային լիագումար նիստը Երևանում անցկացնելու առաջարկի շուրջ ստեղծված խնդրին, նշեց ԱԺ ԲՀԿ խմբակցության պատգամավոր, Եվրանեսթի հայկական պատվիրակության անդամ Նաիրա Զոհրաբյանը:
Պատգամավորը նկատեց, որ ադրբեջանցիների այդ անհիմն պատճառաբանություններն արդեն ձանձրացրել են միջազգային հանրությանը, այդուամենայնիվ, Հայաստանի համար էական է, թե ի վերջո ինչ մարտավարություն կորդեգրի Եվրանեսթի Բյուրոն. «Եթե նրանք տուրք տան Ադրբեջանի վայրահաչոցներին, ապա մենք կարող ենք արձանագրել, որ «Արևելյան գործընկերության» կարևորագույն բաղադրիչներից մեկը՝բազմակողմ ձևաչափը, ուղղակիորեն տորպեդահարվում է Ադրբեջանի կողմից, և եվրոպական կողմը որևէ քայլ չի ձեռնարկում այդ ուղղությամբ»:
Զոհրաբյանը հիշեցրեց, որ «Արևելյան գործընկերությունը» ոչ միայն երկկողմ հարաբերություններ է նախատեսում գործընկեր երկրի և Եվրամիության միջև, այլև բազմակողմ հարաբերություններ գործընկեր երկրների միջև, ինչն էլ այժմ խախտվում է ադրբեջանական կողմի մերժողական դիրքորոշման պատճառով:
Նաիրա Զոհրաբյանի գնահատմամբ՝ եթե Եվրանեսթի առաջին նիստերը սկսվելու են ադրբեջանական կողմի նույն սպառնալից հռետորաբանությամբ և «անհեթեթ լոլոներով», որով վերջիններս աշխատում են ԵԽԽՎ-ում և միջազգային այլ կառույցներում, ապա ցավով պետք է արձանագրել, որ Եվրանեսթի շատ կարևոր խորհրդարանական ամբիոնի աշխատանքները հենց սկզբից կմտնեն փակուղի:
Մեր հարցին՝ տեղի կտա՞ն արդյոք Եվրանեսթում ադրբեջանական առարկություններին, Զոհրաբյանը պատասխանեց. «Տրամաբանությունը հուշում է, որ տեղի կտան և չեն համաձայնի նախնական փուլերում ոչ Հայաստանում, ոչ էլ Ադրբեջանում նիստեր անցկացնելու առաջարկներին: Բայց ես կարծում եմ, միջազգային կառույցները պետք է հստակ արձագանքեն Ադրբեջանի շանտաժներին և ոչ թե փորձեն անընդհատ մեղմել և շրջանցել դրանք»:
