ՀՀ վարչապետին ուղեկցող պատվիրակության կազմում Լոնդոն է այցելել նաև Երևանի քաղաքապետ Կարեն Կարապետյանը։ Այցի շրջանակում քաղաքապետը ներկա է եղել աշխարհի տարբեր երկրներից Լոնդոն ժամանած հայ գործարարների հետ հանդիպմանը, որի ընթացքում քննարկվել են Հայաստանում և մասնավորապես Երևանում հնարավոր ներդրումներին, համատեղ փոխշահավետ ծրագրերի իրականացմանն առնչվող հարցեր։
Քաղաքապետ Կարեն Կարապետյանը Բուքինգհեմյան պալատում մասնակցել է Մեծ Բրիտանիայի Արքայազն Չարլզի և ՀՀ նախկին վարչապետ Արմեն Սարգսյանի նախաձեռնած երկու բարեգործական ծրագրերի՝ «Երևան՝ իմ սեր» և Շոտլանդիայի հարավ-արևմուտքում գտնվող Դամֆիս դղյակի պահպանման նախագծերին նվիրված ընդունելությանը և համերգին:
«Երևան՝ իմ սեր» նախագծի նպատակը Հայաստանի մայրաքաղաքի պատմամշակութային ժառանգության վերականգնումն ու պահպանումն է:
Նախագծի շրջանակներում Երևանի Սուրբ Հովհաննես եկեղեցու շրջակայքում արդեն սկսվել է առաջին երեք շենքերի կառուցումը, որոնցից մեկը մոր և մանկան կենտրոն է, մյուսը՝ կլինիկա՝ խուլ ու համր երեխաների, երրորդը՝ մանկապարտեզ՝ կարիքավոր ընտանիքների երեխաների համար: ՀՀ նախկին վարչապետ Արմեն Սարգսյան նշել է, որ հունիսի վերջին ինքը կայցելի Երևան և քաղաքապետ Կարեն Կարապետյանի հետ տեղում կքննարկեն, թե «Երևա’ն, իմ սեր» ծրագրի շրջանակներում հաջորդիվ ինչ շենքեր են կառուցվելու: Իր հերթին, Կ. Կարապետյանը նշել է, որ Երևանի քաղաքապետարանն ամեն կերպ աջակցելու է ծրագրին: «Սա շատ լավ գաղափար է, և նրա շուրջ կարելի է ծավալել լուրջ փիլիսոփայություն»,- նշել է քաղաքապետը:
