Նիկոլ Գալանտերյանի անվան բեմարվեստի մանկավարժական համալսարանի տնօրեն Արմեն Նալբանդյանը վիրավորված է ՀՀ ԱԺ Վերահսկիչ պալատի հայտարարությունից, որ իրենց գործունեությունը քրեորեն պատժելի արարք է, եւ որ այն համապատասխանում է ՀՀ քրեական օրենսգրքի 118 հոդվածի հատկանիշներին: Նա վիրավորված է, որ Վերահսկիչ պալատի կողմից իրենց գործունեությունը որակվել է որպես ապօրինի ձեռնարկատիրություն: Մամուլի ասուլիսի ժամանակ Արմեն Նալբանդյանը լրագրողներին տեղեկացրեց, որ Նիկոլ Գալանտերյանի անվան բեմարվեստի մանկավարժական համալսարանը ստեղծվել է 2005 թվականի ապրիլի 1-ին` գրանցվելով Արդարադատության նախարարության կողմից եւ ստանալով պետական ռեգիստրի թիվ 03 Ա 068397 վկայականը: Ըստ այդ վկայականի էլ` այն ստացել է ուսումնական հաստատության կարգավիճակ: Վկայակոչելով ՀՀ «Կրթության մասին» օրենքի 30 հոդվածի 2-րդ կետը` Արմեն Նալբանդյանը նշեց, որ ուսումնական հաստատությունները կարող են գործել առանց լիցենզիայի եւ տալ ոչ պետական նմուշի ավարտական փաստաթուղթ, որը եւ անում է Նիկոլ Գալանտերյանի անվան բեմարվեստի մանկավարժական համալսարանը: Արմեն Նալբանդյանը նշեց, որ իր բոլոր պարզաբանումներն ինքը ժամանակին՝ Վերահսկիչ պալատի այցի ժամանակ, ներկայացրել է , սակայն ՎՊ-ի կողմից ոչ մի անհրաժեշտ հետեւություն չի արվել: Իսկ այն փաստը, որ յոթ ամիս անց Վերահսկիչ պալատը հրապարակավ բոլոր ԶԼՄ-ներով մեղադրում է իրենց քրեական հանցագործության մեջ, Արմեն Նալբանդյանը գնահատում է որպես համալսարանի բարի համբավի արատավորում:
