Թուրքական Star թերթի փոխանցմամբ, Թուրքիայում ցանկանում են սպանել Ստամբուլի հայկական «Ակօս» թերթի նախկին խմբագրապետ Հրանտ Դինքի մարդասպան Օգյուն Սամասթին, որի գործն ընթանում է Ստամբուլի 2-րդ անչափահասների դատարանում։ Այս մասին հայտարարել է Թուրքիայի Ազգային հետախուզական կազմակերպությունը (MIT)։
Նշվում է, որ Սամասթին մտադիր է սպանել TKP/ML-TİKKO («Թուրքիայի կոմունիստական կուսակցություն/Մարքսիզմ, Լենինիզմ – Թուրքիայի գյուղացիների և բանվորների ազատագրության բանակ») ծայրահեղ ձախ կազմակերպությունը։ Այդ նպատակով ուժեղացվել են Սամասթի անվտանգության միջոցառումները։
Հիշեցնենք, որ 2007 թվականի հունվարի 19-ին Ստամբուլի Շիշլի թաղամասում ազգայնական Օգյուն Սամասթը հրազենային 3 կրակոց էր արձակել Դինքի գլխին և բացականչել՝ գյավուր (անհավատ), ինչը հիմք տվեց ենթադրելու, որ սպանությունն իրականացվել է ազգային հողի վրա: Մարդասպանին պետք է հիշեցնել, որ Ղուրանի համաձայն՝ այն ժողովուրդը, որն ունի Սուրբ գիրք, չի կարող կոչվել գյավուր:
Ի դեպ, մի քանի օր առաջ Սամասթի անունը Թուրքիայում գրանցվել էր որպես ապրանքանիշ, որն այսուհետ կարող է գործածվել ֆիլմերում, գրքերում ու ամսագրերում, հեռուստատեսությունում, մշակութային տարբեր միջոցառումների, գիտաժողովների ժամանակ և այլն: