Ֆուտբոլի Հայաստանի ազգային հավաքականի նախկին կիսապաշտպան Լևոն Պաչաջյանն այն մարզիկն է, որը Յուրա Մովսիսյանի և Ռոբերտ Արզումանյանի հետ առաջինը աջակցեց համաժողովրդական շարժմանը՝ հանդես գալով համախմբվելու կոչով: Թավշյա հեղափոխությունը յուրահատուկ է նրանով, որ մասնակիցների թվում մեծ թիվ են կազմում մարզաշխարհի ներկայացուցիչները: Վերջին զարգացումների և հնարավոր հանգուցալուծումների վերաբերյալ «Առաջին լրատվական»-ը զրուցել է Պաչաջյանի հետ:
– Լևոն, Դուք առաջին հայտնի մարզիկների շարքում էիք, որ աջակցեցիք համաժողովրդական շարժմանը։ Ձեր կարծիքով՝ թավշյա հեղափոխությունն արդեն իսկ կայացա՞ծ է։
– Ես միշտ էլ կողմնակից եմ եղել տարբեր ժամանակներում որևիցե դրական փոփոխության և այս անգամ էլ զերծ չէի կարող մնալ և շտապեցի աջակցել։ Թեկուզ գործիս բերումով ֆիզիկապես բացակայում եմ Հայաստանից, բայց ամեն կերպ աշխատում եմ իմ ավանդը ունենալ։ Եթե անգամ ոչ՝ ես, ապա իմ ընտանիքը և ընկերության շրջապատը միշտ ներկա են ծավալվող իրադարձություններին։ Իսկ ինչ վերաբերում է թավշյա հեղաշրջման կայացվածությանը, ապա կարծում եմ՝ այս ահռելի շարժումը արդեն իսկ հաջողված կարելի է համարել թեկուզ միայն այն բանի համար, որ կարողացավ փաստացի իշխող կուսակցության լիդերին հեռացնել քաղաքականությունից: Մարդիկ էլ այսպես արտահայտեցին իրենց բողոքի ձայնը այսքան տարի տևող անարդարություններին և Հայաստանում տիրող անմխիթար իրավիճակին։ Իսկ վերջնական արդյունքին, կարելի է ասել, բան չի մնացել։ Կարծում եմ՝ ամեն ինչ կհաջողվի, քանի որ մարդկանց ճնշումը շատ մեծ է և համատարած։
– Ո՞ւմ եք տեսնում ՀՀ վարչապետի ժամանակավոր պաշտոնում մինչև արտահերթ ընտրությունները։
– Միանշանակ Փաշինյանին։ Երկրորդ թեկնածու չի կարող լինել։ Այդ մարդը վայելում է 99%-ի համակրանքը և արժանի է, որպեսզի անցողիկ շրջանում ղեկավարի երկիրը՝ մանավանդ, որ իր նախաձեռնած և իր ու իր թիմի պայքարի միջոցով ծնվեց այս հրաշքը: Պետք է վստահել և օգնել նրան, մնացածը, կարծում եմ, նա լավ գիտի, թե ինչպես գործել։
– Իսկ ի՞նչ է հարկավոր, որ ժողովրդի թեկնածուն վերջնականապես՝ դե յուրե արձանագրի հաղթանակը:
– Կարծում եմ՝ ժողովրդի կողմից արվում է հնարավորը, և մարդիկ օրուգիշեր նրա կողքին են թե՛ Հայաստանում, թե՛ Սփյուռքում։ Միայն մնում է հակառակ բևեռը վերջապես հասկանա, որ պահը եկել է, և ժողովրդի պայքարը պետք է արձանագրվի։ Քաղաքական կամք պետք է դրսևորել և պետության շահերից ելնելով զիջել ու քվեարկել Փաշինյանի օգտին։ Դա է մնում։
– Այս շարժման ընթացքում մարզաշխարհի բազմաթիվ ներկայացուցիչների տեսանք հրապարակում։ Կարելի՞ է այս փաստը շրջադարձային համարել հայկական սպորտի համար։
– Դե, մարդիկ զգում են, որ այս պահը պատմական է, և բոլորս միասին պետք է պայքարենք մեր ապագայի համար։ Քաղաքացիական հասարակությունը այսքանով մեծ քայլ է անում և բոլորին հայտնում, որ այլևս պետք է պատասխանատու լինել։ Ամեն քաղաքացի՝ անկախ նրանից, թե որ բնագավառում է աշխատում, ցույց է տալիս, որ նա ունակ է պահանջատեր լինել այն մարդկանցից, ովքեր ստանձնել են Հայաստանի ղեկավարումը։ Ցույց է տալիս, որ առաջվա նման երբեք էլ չի լինելու՝ անկախ նրանից, թե ինչպես այս ամենը կավարտվի։ Այս ամենը շատ շատերին է ոգևորել, և դա ճիշտ է։
– Կարելի՞ է ասել, որ մարզաշխարհի ներկայացուցիչները խթանեցին թավշյա հեղափոխության կայացմանը:
– Ես կոնկրետ մի շերտի չէի վերագրի այս շարժման հաջողությունը։ Այս հաղթանակը ամբողջ ազգինն է։ Նաև չեմ կարող չնշել ուսանողության ոգևորիչ, պայքարին միտված և նպատակասլաց քայլերը։ Իրենք բոլորից առջևում էին քայլում՝ իրենց ետևից տանելով թե՛ սպորտի, թե՛ այլ բնագավառների ներկայացուցիչներին:
– Ի՞նչ կմաղթեք մարզաշխարհի ներկայացուցիչներին և հրապարակում կանգնած մարդկանց։
– Մաղթանքս միայն մեկն է՝ մնալ հավատարիմ այն արժեքներին, կոչերին և պայքարի ձևակերպին, որով մինչև հիմա առաջնորդել են մարդիկ։ Կարծում եմ՝ շատ կարևոր է, որ մարդիկ մինչև վերջ առանց երկմտելու պայքարեն, քանի որ հաղթելու են։