Վերջին օրերին մեր երկրում մարզաշխարհի ներկայացուցիչները կարծես երկու խմբի էին բաժանվել: Ճանաչված մի շարք մարզիկներ, ինչպես օրինակ, Յուրա Մովսիսյանը, Ռոբերտ Արզումանյանն ու Լևոն Պաչաջյանը, հանդես եկան հայտարարությամբ՝ աջակցելով համաժողովրդական շարժմանը:
Հասարակությունն անհամբեր սպասում էր ֆուտբոլի Հայաստանի ազգային հավաքականի ավագ Հենրիխ Մխիթարյանի խոսքին: Սերժ Սարգսյանի հրաժարականից ժամեր առաջ հայտարարությամբ հանդես եկավ նաև Մխիթարյանը: «Ես իմ ժողովրդի զավակն եմ և հպարտ եմ դրանով: Ցանկացած հայի կյանքը ինձ համար ամեն ինչից թանկ է: Ուստի բոլորին խնդրում եմ և կոչ եմ անում ցուցաբերել խոհեմություն և խնդիրները լուծել միմիայն խաղաղ ճանապարհով: Քեզ հետ եմ, իմ հայ ազգ»:
Համատեղ հայտարարությամբ հանդես եկան նաև մի խումբ լեգենդար մարզիկներ, ինչպիսիք են՝ Ալբերտ Ազարյանը, Հոկսեն Միրզոյանը, Արթուր Ալեքսանյանը, Լևոն Ջուլֆալակյանն ու այլք: Ըստ էության, նրանք ևս աջակցություն հայտնեցին փողոց դուրս եկած քաղաքացիներին. «Հայաստանի հրապարակներում ու փողոցներում մեր քույրերն ու եղբայրներն են՝ տարիներ շարունակ կուտակված խնդիրների համար իրենց արդարացի բողոքի ձայնը բարձրացնող քաղաքացիները և նրանց անվտանգությունն ապահովելու առաքելություն ունեցող ոստիկանները: Մենք՝ մարզաշխարհի ներկայացուցիչներս, մեր մտահոգությունն ենք հայտնում ստեղծված իրավիճակի կապակցությամբ և բոլորին, առանց բացառության բոլորին՝ ընդդիմության առաջնորդներին ու քաղաքացիներին, իշխանությանն ու իրավապահ մարմիններին, սթափության ու սառնասրտության կոչ ենք անում։ Համոզված ենք, որ բոլոր խնդիրները հնարավոր է լուծել միմիայն և բացառապես միասնական ուժերով, կառուցողական համագործակցությամբ և խաղաղ ճանապարհով՝ բացառելով ուժի կիրառումը»,- մասնավորապես ասված էր հայտարարության մեջ:
Վերը թվարկված բոլոր մարզիկները ցուցաբերել են Հայաստանի քաղաքացուն վայել գիտակցություն: Նման հայտարարությունները, հորդորներն ու աջակցությունն անխոս նպաստեցին, որպեսզի լարված իրավիճակը խաղաղ հանգուցալուծում ստանա:
Վերջին օրերին ոչ ադեկատ և սկանդալային կարելի է համարել թերևս մեր շախմատիստների հայտարարությունը: Հայտարարություն, որը հասարակության շրջանում փոխել է վերաբերմունքը հայտնի տիտղոսակիր շախմատիստների նկատմամբ: «Երկար տարիներ աշխատելով Սերժ Սարգսյանի հետ՝ մենք՝ շախմատիստներս, ավելի քան զգացել ենք նրա պատրաստակամությունն ու նվիրումը՝ անել ամեն ինչ Հայաստանի ու հայ ժողովրդի նվաճումների համար։ Այդ ամենը բազմիցս ապացուցվել է մեր հաջողություններով, ինչի արդյունքում բազմաթիվ առիթներ ենք ունեցել հպարտանալու մեր երկրով, մեր ժողովրդի ստեղծագործ և մտավոր ուժով։ Հենց Սերժ Սարգսյանի առաջնորդությամբ է, որ Հայաստանի շախմատի ազգային հավաքականը 3 անգամ նվաճեց օլիմպիական չեմպիոնի և մեկ անգամ էլ աշխարհի չեմպիոնի կոչումը՝ փաստորեն դառնալով աշխարհի ամենատիտղոսակիր հավաքականը: Համոզված ենք, որ շախմատի ոլորտում մեր ունեցած ու շարունակվելիք հաջողությունները ձեռք են բերվել այդ թվում նաև մեր այն ներքին համոզմամբ ու վստահությամբ, որ Հայրենիքում բոլորս միասնական ենք, մի ուժ ենք ու ուս ուսի կանգնած։ Այսօր ևս մեկ անգամ ուզում ենք վերահաստատել մեր այդ համոզումը, որ մեր ներքին միասնությունն ու ուժը մեր հաղթանակների առհավատչյան են եղել ու կլինեն։ Հաշվի առնելով այս օրերին մեր երկրում տեղ գտած իրադարձությունները՝ կոչ ենք անում բոլոր կողմերին մնալ ողջամտության դաշտում և ազգային բացառիկ համերաշխության ոգուն հավատարիմ։ Անթույլատրելի ենք համարում բոլոր այն քայերը, կոչերն ու գործողությունները, որոնք կարող են վնասել թե մեր երկրին, թե մեր հասարակության յուրաքանչյուր անդամի։ Հավատացած ենք, որ որևէ իրավունք չպետք է սահմանափակվի, միաժամանակ, սակայն, որևէ իրավունքի իրացում չպետք է ոտնահարի այլոց իրավունքներն ու խաչ քաշի մեր ձեռքբերումների վրա: Համոզված ենք, որ որպես շախմատային պետություն՝ միահամուռ ջանքերով կկարողանանք գտնել իրավիճակի լավագույն լուծումը»,- ասված էր հայտարարության մեջ:
Կարծում ենք՝ մեկնաբանությունն ավելորդ է: Այս հայտարարության տակ ստորագրել են Լևոն Արոնյանը, Սմբատ Լպուտյանը, Վլադիմիր Հակոբյանը, Արտաշես Մինասյանը, Սերգեյ Մովսիսյանը, Գաբրիել Սարգսյանը, Տիգրան Լ. Պետրոսյանը, Ռաֆայել Վահանյանը և Արշակ Պետրոսյանը: Լինելով մտքի խաղի ներկայացուցիչներ՝ վերը թվարկված մարզիկները ակնհայտորեն կոպիտ սխալ թույլ տվեցին՝ իրենք իրենց գցելով մատային իրավիճակում: Հասկանալի է, որ Սերժ Սարգսյանը Հայաստանի շախմատի ֆեդերացիայի նախագահն է: Բայց սա ամենևին էլ չի նշանակում, որ կարելի է ընդգծված կերպով նախատել հրապարակում կանգնած ժողովրդին, որը ի վերջո հաղթեց: Կարծում ենք՝ շատ ավելի ընդունելի կլիներ, եթե մեր շախմատիստները լռեին:
Այսօր մարզաշխարհի շատ ներկայացուցիչներ ուղղակի նախատում են ճանաչված շախմատիստներին և մասնավորապես Լևոն Արոնյանին: Նշեք նաև, որ Սերժ Սարգսյանը Արոնյանի և Գաբրիել Սարգսյանի քավորն է: Այս հանգամանքը ևս շահարկման առարկա է դարձել: Ամեն դեպքում վերը նշված բոլոր շախմատիստները շարունակելու են միջազգային ասպարեզում ներկայացնել մեր երկիրը, և կասկածից վեր է, որ նրանց հաղթանակները և հաջողությունները շարունակելու են ուրախության և հպարտության պահեր պարգևել հասարակությանը: