Այսօր ԱԺ «Ժառանգության» պատգամավոր Անահիտ Բախշյանը ՀՀ ֆինանսների նախարար Տիգրան Դավթյանին հարց ուղղեց` կապված նրա հետ, թե ինչու են ավտոմեքենաների պարտադիր ապահովագրման սակագների հաշվարկման հիմքում պաշտոնական վիճակագրությունից 20 անգամ տարբերվող թվեր դրվել: Այսպես, համաձայն պաշտոնական վիճակագրության՝ Հայաստանում տարեկան գրանցվում է 1500 ավտոտրանսպորտային պատահար: Սակայն ավտոմեքենաների պարտադիր ապահովագրության սակագներ սահմանելիս Ապահովագրողների բյուրոն ու ԿԲ-ն հիմք են ընդունել տարեկան 30 հազար պատահարը, այսինքն` մոտ 20 անգամ շատ: Հասկանալի է, որ ավտոմեքենաների պարտադիր ապահովագրության ինստիտուտի ներդրումով պատահարների վիճակագրությունը կաճի: Բայց այն կարող է աճել ասենք` մի 5, վատագույն դեպքում մի 7-8 անգամ: Արդյունքում այդ ուռճացված թվերի հիման վրա ստացվել են շատ բարձր սակագներ, որն էլ գերշահույթներ է ապահովելու ապահովագրական ընկերությունների համար: Այս հարցը տիկին Բախշյանը ստիպված եղավ երկու անգամ կրկնել, սակայն Դավթյանն այդպես էլ չկարողացավ պատասխանել: Նա շարունակ կրկնում էր. «Սրանք օդից վերցված գներ չեն»:
