Ինչու են Հայաստանում ավտոմեքենաների պարտադիր ապահովագրման սակագները այնքան, որքան Արևելյան Եվրոպայի երկրներում, սակայն պատահարների փոխհատուցման գումարները տասնյակ անգամներով զիջում են այդ երկրների փոխհատուցումներին: Եվ ինչո՞ւ է ԱՊՀ երկրների համեմատ ևս Հայաստանում պարտադիր ապահովագրման սակագները ամենաբարձրներից: Այս հարցը ԱԺ «Ժառանգություն» խմբակցության պատգամավոր Անահիտ Բախշյանն այսօր ուղղեց ՀՀ ֆինանսների նախարար Տիգրան Դավթյանին: Վերջինս թանկ սակագները բացատրեց տնտեսագիտորեն` «մասշտաբի էֆեկտով»` նշելով, որ այդ սակագները իրենք օդից չեն վերցրել: «Ինչքան մեծ է շուկան, միավորի գինը այնքան փոքր է: Եվ այս համեմատությունը Եվրոպական երկրների հետ ի վնաս մեզ է, քանի որ եթե մեքենաների քանակը շատ է, միավորի ծախսը ավելի քիչ է և հնարավորություն կա միավորի գինը ավելի իջեցնել: Մեր մոտ շուկան փոքր է, դրա համար էլ մասշտաբի էֆեկտը չենք ստանում»,- ասաց նախարարը: