Ռուսական Regnum գործակալության փոխանցմամբ՝ ԵԱՀԿ Մինսկի խմբի ֆրանսիացի համանախագահ Բեռնար Ֆասիեն Եվրախորհրդարանում ղարաբաղյան հակամարտությանն առնչվող լսումների ժամանակ հայտարարել է, որ ԵԱՀԿ Մինսկի խմբի համանախագահները դրական արդյունքներ են ակնկալում Հայաստանի, Ադրբեջանի և Ռուսաստանի նախագահների՝ հունիսի 25-ին Կազանում կայանալիք հանդիպումից.
«Սակայն կան այնպիսի պահեր, երբ ավելի լավ է շունչը պահել և չկիսել դեռևս չսպանված արջի մորթին։ Ես ու Բրադտկեն լավատեղյակ ենք հունիսի 11-ին Մոսկվայում Հայաստանի, Ռուսաստանի ու Ադրբեջանի արտգործնախարարների հանդիպման մանրամասներից, և ես ավելորդ եմ համարում մոտ ապագայում առաջընթացի գրանցման հետ կապված հույսերը։
Ինչ վերաբերում է բանակցային գործընթացում Ռուսաստանի մասնակցությանը, ապա, բնականաբար, նա խաղում է վճռորոշ դեր։ Մոսկվան ջանքեր է գործադրում, որպեսզի հակամարտող կողմերն ընդունեն հիմնարար (մադրիդյան) սկզբունքների վերջնական տարբերակը, որոնք մշակվել են բոլոր երեք համանախագահների կողմից»։
Հակամարտող կողմերին Ռուսաստանի զենք վաճառելու հետ կապված՝ Ֆասիեն նկատել է. «Միայն Ռուսաստանը չէ, որ սպառազինություն է վաճառում հակամարտող կողմերին։ Մենք բոլորս քաջատեղյակ ենք այդ մասին։ Դուք գիտեք, որ այսօր գոյություն չունի գեթ մեկ եվրոպական երկիր, որը կվերահսկեր անօդաչու ինքնաթիռների արտադրության ու գործածման բոլոր ասպեկտները։
Դուք նաև պետք է տեղյակ լինեք, որ հունիսի 26-ին Բաքվում կայանալիք ռազմական շքերթի ժամանակ ցուցադրվելու է, որ Ադրբեջանն ունակ է միայնակ արտադրել այդպիսի անօդաչու ինքնաթիռներ։
Իսկ ինչպե՞ս դա նրան հաջողվեց։ Անհրաժեշտ է հիշել, որ միայն երկու երկրներ են վերահսկում այդ ոլորտը՝ ԱՄՆ-ը և ևս մեկ երկիր, որի մասին դուք շատ լավ գիտեք։ Ռուսաստանից բացի, ևս մեկը պետք է օգնած լիներ Ադրբեջանին այդ հարցում։ Եվ դա ԱՄՆ-ը չէ»։ Այստեղ Ֆասիեն ակնարկում է կա՛մ Իսրայելին, կա՛մ Թուրքիային։
Ֆասիեն վտանգավոր է համարել սպառազինությունների մրցավազքը և հիշեցրել է, որ Ադրբեջանի միայն ռազմական բյուջեն գերազանցում է Հայաստանի ողջ բյուջեն։
Նա նաև ընդգծել է, որ միջնորդները չեն կարող հակամարտության կարգավորումը փաթաթել հակամարտող կողմերի վզին, քանի որ նրանք իրենք պետք է համաձայնության գան փոխզիջումների հարցում. «Ժամանակին ես դեսպան եմ եղել Վրաստանում և կարող եմ ասել, որ «փոխզիջում» բառը գոյություն չունի այս տարածաշրջանի և ոչ մի երկրում»։