Լոնդոնում պաշտոնական այցով գտնվող ՀՀ վարչապետ Տիգրան Սարգսյանը պատասխանել է հայ-թուրքական հարաբերությունների վերաբերյալ BBC-ի ռուսական ծառայության լրագրող Մարկ Գրիգորյանի հարցին:
Մարկ Գրիգորյան. «Հայ-թուրքական հարաբերություններն ինչ-որ պահի փակուղում հայտնվեցին: Անցած հանգստյան օրերին Թուրքիայում տեղի ունեցան ընտրություններ, և կրկին իշխանության եկավ Էրդողանի կուսակցությունը: Ի՞նչ եք կարծում, արդյոք կլինե՞ն փոփոխություններ հայ-թուրքական հարաբերություններում այն բանից հետո, երբ Էրդողանի կուսակցությունը կրկին եկավ իշխանության»:
Տիգրան Սարգսյան. «Մենք հույս ունենք, որ Թուրքիան հայ-թուրքական հարաբերությունների կարգավորման հարցում հետևողական կլինի, ես մասնավորապես նկատի ունեմ ստորագրված արձանագրությունները, որոնց էությունն այն էր, որ երկու հարևան երկրները մտադիր են հաստատել նորմալ հարաբերություններ առանց որևէ նախապայմանի: Հայաստանի դիրքորոշումը վերջին 20 տարիների ընթացքում մնում է անփոփոխ. մենք պատրաստ ենք Թուրքիայի հետ հաստատել հարաբերություններ՝ առանց նախապայմանների: Եվ բոլոր այն պայմանավորվածությունները, որոնք ձեռք էին բերվել թուրքական կողմի հետ, բխում էին իրավիճակի սկզբունքային այս ընկալումից: Մենք ուրախ կլինենք, եթե մեր թուրք գործընկերները նույնպես գան այն եզրակացության, որ 21-րդ դարում փակ սահմաններ ունենալը ուղղակի անհեթեթություն է»:
Հարցազրույցը կարող եք դիտել այստեղ: