Վարչապետ Տիգրան Սարգսյանը հարցազրույց է տվել ամերիկյան CNN հեռուստաալիքին, որում անդրադարձել է Թուրքիայի հետ հարաբերություններին, տնտեսությանը և ղարաբաղյան հիմնախնդրին:
Անդրադառնալով տնտեսական խնդիրներին՝ վարչապետն ասել է, որ տնտեսական ճգնաժամի հենց սկզբում առաջին խնդիրը, որին բախվել է Հայաստանը, այն էր, որ տնտեսական ճգնաժամի պատճառը հիմնականում տնտեսության ոչ դիվերսիֆիկացված լինելն է: Ճգնաժամը հաղթահարելու համար, ըստ վարչապետի, աշխատանք է կատարվել երեք ոլորտներում՝ տնտեսության հետագա դիվերսիֆիկացում, ենթակառուցվածքների և բիզնես միջավայրի բարելավում: Եվ այս բարեփոխումների շնորհիվ ՀՀ կառավարությունը հույս ունի հետագայում էլ լավացնել միջավայրը, ինչը թույլ կտա հաղթահարել ճգնաժամի հետևանքները:
CNN-ի լրագրողի դիտարկումին, թե 2000 թ. Հայաստանի արտահանումը կազմում էր արտաքին առևտրի 20%-ը, իսկ հիմա ընդամենը 12%-ը, վարչապետն արձագանքել է, որ Հայաստանի առևտրային բալանսը շարունակում է զգալիորեն բացասական մնալ: Ըստ վարչապետի՝ արտահանման խրախուսումն էլ առաջնային է կառավարության համար: Սարգսյանը ներկայացրել է մեր արտահանմանը նպաստող հիմնական երեք ուղղությունները՝ հանքարդյունաբերություն, բարձր տեխնոլոգիաներ և զբոսաշրջություն:
CNN-ի լրագրողը հետաքրքրվել է, թե որքանով է կախված Հայաստանի տնտեսությունը հայկական սփյուռքից, քանի որ հայ ժողովրդի մեծ մասն ապրում է Հայաստանից դուրս: Տիգրան Սարգսյանը պատասխանել է, որ Հայաստանի տնտեսությունում ներդրումների հիմնական աղբյուրը հայկական սփյուռքն է: Նա ավելացրել է, որ Սփյուռքից ներդրումներն միայն ուղիղ չեն, այլ նաև մասնավոր տրանսֆերտների միջոցով, ինչն օգնել է Հայաստանին հաղթահարել ճգնաժամի հետևանքները:
CNN-ի լրագրողի այն հարցին, որ, ղարաբաղյան հարցի հետ կապված, ամպերը միշտ կախված են Հայաստանի վրա, և արդյո՞ք այս ամսվա վերջին Հայաստան, Ադրբեջան, Ռուսաստան եռակողմ հանդիպումից հետո որևէ առաջընթաց ակնկալվում է, վարչապետը պատասխանել է, որ Հայաստանի իշխանություններն առաջ գնալու համար ունեն քաղաքական կամք, չնայած դա հեշտ չէ: Տիգրան Սարգսյանը նաև հույս է հայտնել, որ ադրբեջանցի գործընկերները նույնպես քաղաքական կամք կդրսևորեն:
Անդրադառնալով CNN-ի լրագրողի հարցին՝ ինչպե՞ս են զարգանում Թուրքիայի հետ հարաբերությունները՝ հաշվի առնելով Առաջին համաշխարհային պատերազմի տարիներին տեղի ունեցածը, վարչապետն ասել է, որ վերջին 20 տարիների ընթացքում Հայաստանն այս կապակցությամբ ունեցել է հստակ դիրքորոշում՝ «մենք պատրաստ ենք կարգավորել Թուրքիայի հետ հարաբերությունները առանց որևէ նախապայմանի»: Տիգրան Սարգսյանը շեշտել է, թե վերջին զարգացումները ցույց տվեցին, որ Թուրքիան պատրաստ չէ դրան: Կարգավորումը, ըստ ՀՀ վարչապետի, միայն Հայաստանի խնդիրը չէ, Թուրքիայի քաղաքական կշիռը կմեծանա, եթե նա հետևի խաղի միջազգային կանոններին: «Թուրքիան պետք է շարունակի ժողովրդավարական բարեփոխումները ԵՄ-ին անդամակցության ճանապարհին, ինչի արդյունքում մենք կարող ենք կառուցել կայուն հարաբերություններ մեր հարևան երկրի հետ»,- ասել է վարչապետը: