Կալիֆորնիայի համալսարանին կից անասնաբուժական կլինիկայի մասնագետները դուրս են գրել աշխարհով մեկ համբավ ձեռք բերած իրենց չորքոտանի հիվանդին՝ Կաբանգ անունով շանը: Ֆիլիպիններում՝ մոտոցիկլետի անիվների տակից երկու փոքրիկ երեխաներին փրկած փողոցային շունը, հաջողությամբ տարել է հաշմված մռութի վիրահատությունը:
Բժիշկները կարողացել են փակել Կաբանգի սարսափելի վերքը՝ քթի և վերին ծնոտի մասում: Բժիշկները շան վզից և ծոծրակից մաշկ են վերցրել, սակայն ամբողջովին վերականգնել ոսկորները չի հաջողվել:
Մենք հյուսվածքներով փակել ենք վերքը, որը մինչ այդ անընդհատ օդի ազդեցությանն էր ենթարկվում՝ մեծացնելով վարակի հավանականությունը: Կաբանգն այժմ առողջ և շատ երջանիկ էակ է,- ասել է համալսարանի պրոֆեսոր Ֆրենկ Վերսթրաեթը::
Ակնկալվում է, որ արդեն հինգշաբթի օրը Կաբանգին կուղարկեն Ֆիլիպիններ՝ իր տերերի մոտ: Ընտանիքի սիրելին արդեն մոտ մեկ տարի չի եղել տանը: Նրան բուժել են նաև օնկոլոգիական և մի շարք այլ հիվանդություններից: Կաբանգի բուժման բոլոր ծախսերը վճարվել են տարբեր երկրների մարդկանցից հավաքած նվիրաբերություններով:
Ամենից շատ Կաբանգի վերադարձին սպասում են 12-ամյա Դինա Բունգալն ու նրա 4-ամյա քույրիկը: Հենց նրանց է փրկել շունը՝ նետվելով տան մոտով սլացող մոտոցիկլետի տակ և մի կողմ հրելով երեխաներին: