Շաբաթ օրը՝ ապրիլի 14-ի երեկոյան, Ժնևի Թրամպլե զբոսայգում տեղի է ունեցել «Հիշողության լապտերներ» հուշարձանի բացումը, որի հեղինակն է ֆրանսահայ արվեստագետ Մելիք Օհանյանը:
Արարողությանը ներկա է եղել նաև Շվեյցարիայում Հայաստանի դեսպան Շառլ Ազնավուրը: Նա Շվեյցարիայի ձայն-հեռատեսիլի՝ RTS-ի հետ զրույցում ասել է. «Սա հուշարձան է, որը մեզ կհուշի, որ նման բան այլևս երբեք չպետք է կրկնվի»։
«Շվեյցարիայում Հայոց ցեղասպանությունը ճանաչել են երկրի Ազգային խորհուրդը, ինչպես նաև Ժնև քաղաքը՝ առանձին բանաձևով: Նման հուշարձան կառուցելու ծրագրեր վաղուց կային, սակայն ամեն անգամ դրանք բախվում էին թուրքական հակազդեցությանը և հետաձգվում: Ժնևը 2008-ից քվեարկել էր Հայոց ցեղասպանության զոհերի հիշատակին նվիրված հուշարձան կառուցելու օգտին»,- հայտնում է RTS-ը:
Հուշարձանը կազմված է 10 մետրանոց 9 լապտերներից: «Այս հուշարձանի գաղափարն այն է, որ չունի միասնական մեկ կետ. այդ կետը դիտո՛ղն է, այցելուն։ Այն նաև խորհրդանշում է Սփյուռքը, որը ցրված է աշխարհի չորս ծագերում, և լույս է սփռում այդ ծագերից»,- ասել է Օհանյանը:
Հակառակ այն բանին, որ հուշարձանը հաճախ վերագրվում է միայն Հայոց ցեղասպանության զոհերի հիշատակին, դա բոլորովին էլ ճիշտ չէ: Արդարև, շվեյցարահայ ազգային դեմքերից Մարալ Սիմսարից ստացանք հետևյալ ճշտումը. «Ճիշտ է, որ շատ շատերն այդպես են կարծում, բայց իրականում այն նվիրված է Ժնևի բնակչությանը և Հայերի հասարակաց հիշողության (Mémoire commune des Genevois et des Arméniens), նաև՝ ցեղասպանությունների և մարդկության դեմ ոճիրների հիշողության պայքարին։ Ամբողջական թղթածրարը գտնվում է Ժնևի քաղաքապետարանի կայքէջում»:
