Грузия Online-ի փոխանցմամբ, Շվեդիայի արտգործնախարար Կառլ Բիլդտը Թբիլիսիում հանդիպում է ունեցել իր վրաց գործընկեր Գրիգոլ Վաշաձեի հետ, որից հետո կազմակերպված մամլո ասուլիսում նշել է.
«Վրաստանը լավագույն արդյունքն ունի «Արևելյան գործընկերություն» ծրագրի շրջանակներում ընդգրկված երկրների շարքում։ Վրաստանը չպետք է դադարեցնի իր մասնակցությունը ժնևյան բանակցություններին։ Դա շատ կարևոր գործընթաց է, թեև դեռևս դրանում մեծ առաջընթաց չի գրանցվել։ Այդ գործընթացի շրջանակներում կարելի է աստիճանաբար լուծել բազմաթիվ խնդիրներ։
Ինչ վերաբերում է Առևտրի համաշխարհային կազմակերպությանը (ԱՀԿ) Ռուսաստանի անդամակցությանը, ապա դա օգտակար կլինի բոլորի համար, երկարատև հեռանկարում՝ նաև Վրաստանի համար։ Սակայն դեռևս պետք է պատասխան տրվի Ռուսաստանի կողմից Վրաստանում ահաբեկչությունների նախապատրաստման հարցին»։
Գրիգոլ Վաշաձեն իր հերթին հերքել է այն տեղեկատվությունը, թե Վրաստանը պատրաստվում է լքել ժնևյան ու ԱՀԿ-ին Ռուսաստանի անդամակցության շուրջ տարվող բանակցությունները.
«Այդպիսի բան չկա, որևէ վրաց պաշտոնատար անձ չի հայտարարել, թե Վրաստանը լքում է ժնևյան բանակցությունները։ Մեր պատվիրակության ղեկավար Գիգա Բոկերիան հայտարարել է, որ ռուսական կողմը շարունակում է ահաբեկչությունների միջոցով սպառնալիք ստեղծել, սակայն մենք չենք ասել, թե կասեցնում ենք գործընթացը։ Մենք պարզապես ասում ենք, որ անթույլատրելի է, որ մի օր Ռուսաստանն ահաբեկիչներ է գործուղում Վրաստան, իսկ հաջորդ օրը մեզ հետ բանակցում է Ժնևում։
Ինչ վերաբերում է ԱՀԿ շուրջ գործընթացին, ապա այս դեպքում նույնպես ոչ մի խոսք չի գնացել դրա դադարեցման մասին։ Գործընթացը շարունակվում է, և մենք հրաժարվում ենք բացահայտել մեր պայմանավորվածությունների մանրամասները։ Վրաստանը գնում է Շվեյցարիա ոչ թե ԱՀԿ-ին Ռուսաստանի անդամակցությունը շրջափակելու, այլ փոխզիջումային տարբերակներ փնտրելու համար»։
Հիշեցնենք, որ 2008 թվականի հոկտեմբերից սկսած՝ ժնևյան հանդիպումներին մասնակցում են Վրաստանի և Ռուսաստանի (ներառյալ Աբխազիան և Հարավային Օսիան), ԱՄՆ-ի, ՄԱԿ-ի, ԵԱՀԿ-ի ու ԵՄ-ի ներկայացուցիչները։ Դրանցում քննարկվում են Աբխազիայի և Հարավային Օսիայի, փախստականների վերադարձի, անվտանգության երաշխիքների և այլ հարցեր։
Ինչ վերաբերում է ԱՀԿ-ին Ռուսաստանի անդամակցության շուրջ բանակցություններին, ապա 2008 թվականի օգոստոսին տեղի ունեցած ռուս-վրացական հնգօրյա պատերազմից հետո՝ այս տարվա մարտի 10-ին, Ռուսաստանն ու Վրաստանն առաջին անգամ Շվեյցարիայի Բեռն քաղաքում ԱՀԿ-ին Ռուսաստանի անդամակցության համար նստեցին բանակցությունների սեղանի շուրջ, ինչը սակայն ավարտվեց անարդյունք։
