Թուրքական Hürriyet թերթի փոխանցմամբ, պաշտոնական Անկարան թույլատրել է հոլիվուդյան աստղ և ՄԱԿ-ի բարի կամքի դեսպան Անջելինա Ջոլիին այցելել երկրի հարավարևելյան հատվածում գտնվող Հաթայ նահանգ, ուր գտնվում են սիրիացի փախստականները։
Նշվում է, որ երեկ Ջոլին դիմել էր թուրքական իշխանություններին՝ Հաթայ այցելելու թույլտվության խնդրանքով։ Դիվանագիտական աղբյուրները հայտնում են, որ պաշտոնական Անկարան դրական պատասխան է տվել։
Ներկայիս դրությամբ Հաթայի նահանգում ստեղծված 4 խոշոր ճամբարներում (վրանային քաղաքներ) գտնվում են 8421 սիրիացի փախստականներ։ Այսօր նրանց տեսակցել է Թուրքիայի արտգործնախարար Ահմեդ Դավութօղլուն։
Հիշեցնենք, որ մեկ ամիս առաջ էլ Անջելինա Ջոլին այցելել էր գերմանական հոսպիտալներից մեկում գտնվող երկու վրացի զինծառայողի, որոնք վիրավորվել էին Աֆղանստանում։
