Գլենդելում հայ առաջնորդները ԱՄՆ նախագահ Բարաք Օբամային կոչ են արել ճանաչել Հայոց ցեղասպանությունն ու ցուցադրել Ցեղասպանությունից մազապուրծ եղած հայ որբերի կողմից 10 ամիսների ընթացքում գործած գորգը: Կոչն արվել է Օբամայի կողմից Գլենդելում տեղակայված DreamWorks Animation ստուդիա կատարելիք այցի օրը: Այս մասին հայտնում է Glendale News-Press-ը:
Գորգը 1920 թվականին փախստականների ճամբարում գործել են հայ որբերը և 1925-ին նվիրել նախագահ Քելվին Քուլիջին՝ ի նշան երախտագիտության Առաջին աշխարհամարտին ամերիկացիների ցուցաբերած մարդասիրական օգնության:
Գորգը մնում է Սպիտակ տան պահեստում: Սպասվում էր, որ այն կներկայացվի դեկտեմբերի 16-ին՝ Սմիթսոնյան թանգարանում, Հակոբ Մարտին Դերանյանի «Նախագահ Քելվին Քուլիջն ու հայ որբերի գորգը» գրքի շնորհանդեսի ժամանակ, սակայն Սպիտակ տունը նպատակահարմար չի գտնում այն մի քանի ժամով տրամադրելը:
«Գորգը հայ և ամերիկացի ժողովուրդների միջև բարեկամությունը խորհրդանշող բարի ժեստ է: Դա ամերիկյան պատմության մի մասն է»,- ասել է Հայ Առաքելական եկեղեցու Արևմտյան թեմի առաջնորդ, արքեպիսկոպոս Մուշեղ Մարտիրոսյանը:
Վահան և Անուշ Չամլյանների հայկական դպրոցի աշակերտները, ԱՄՆ-ի Հայ դատի հանձնախմբի ներկայացուցիչները և տեղի հոգևորականությունը ստորագրել են նամակ՝ ուղղված Օբամային:
Գլենդելի քաղաքային խորհրդի անդամ Զարեհ Սինանյանը մամլո ասուլիսի ժամանակ հայտարարել է, որ նամակը կփոխանցի Գլենդելի քաղաքապետ Դեյվ Ուիվերին կամ Բըրբենքից Ներկայացուցիչների պալատի անդամ Ադամ Շիֆին, ովքեր պետք է հանդիպեն Օբամային DreamWorks այցի ժամանակ:
Սինանյանը հույս է հայտնել, որ Օբաման այդ առնչությամբ ճիշտ որոշում կկայացնի և թույլ կտա, որ գորգը ցուցադրվի:
