Շանհայի համագործակցության կազմակերպությունը (ՇՀԿ) կարող է շուկա հանել իր պահեստային արտարժույթը: Ինչպես փոխանցում է Interfax գործակալությունը, այս մասին հայտարարել է Ղազախստանի նախագահ Նուրսուլթան Նազարբաևը ՇՀԿ-ի` Աստանայում տեղի ունեցող գագաթնաժողովի ժամանակ:
Նազարբաևի խոսքերով՝ պետությունների միջև իրականացվող արտարժութային փոխանակման գործողությունները, ՇՀԿ անդամ երկրների միջև արտարժույթի գործողությունները առաջին քայլերն են միջազգային միասնական արտարժույթ ստեղծելու ճանապարհին:
Բացի այդ, Նազարբաևը հանդես է եկել իր հարևանների հետ դրամը միավորելու առաջարկությամբ: Մասնավորապես, Նուրսուլթան Նազարբաևը առաջարկել է միացնել ԵվրԱզԷՍի անդամ երկների (Ղազախստան, Ռուսաստան, Բելառուս, Ղրղզստան և Տաջիկստան) դրամային միավորները, իսկ նոր դրամային միավորն էլ անվանել «եվրազ» կամ «եվրազիա»: 2009 թ. կեսերին նա նաև առաջարկում էր միասնական դրամ ստեղծել ՇՀԿ անդամ երկրների համար: