Հնարամիտ ֆերմերն ապացուցել է, որ տուն կարելի է ձեռք բերել առանց հիփոթեքային վարկի: Նա էկոլոգիապես մաքուր տուն է կառուցել ընդամենը 240 դոլարով:
59-ամյա ֆերմեր Մայքլ Բաքի տունը գտնվում է Օքսֆորդի մոտակայքում՝ անտառային տեղանքում: Բրիտանացու խոսքերով՝ ինքը հիփոթեքին մարտահրավեր նետելու նպատակով ինքնուրույն է կառուցել իր տունը, որպեսզի ապացուցի, որ կարելի է տուն կառուցել առանց հավերժ պարտք մնալու:
Ութ ամիս շարունակ ֆերմերը կանգնեցրել է տան պատերը՝ դրա համար ավազից, կավից, ծղոտից, ջրից և հողից խառնուրդ պատրաստելով: Նույն հաջողությամբ նա կառուցել է տանիքը և հարդարել տունը:
Տան տաքությունը վառարանն է ապահովում: Բրիտանացին նշում է, որ ստիպված չի լինի վճարել ջրի համար, քանի որ ջուրը խողովակով ստանում է բնական ակունքից:
Սառնարանին փոխարինում է ոչ խորը փոսը, որը մուտքի դռան հարևանությամբ է փորվել, իսկ փոքր խոհանոցում տեղադրված գազօջախի վրա կարելի է սնունդ պատրաստել: Բաքը չի մոռացել նաև սանհանգույցի մասին:
Չնայած նեղ պայմաններին՝ բրիտանացին իր կառուցած կացարանն արդեն վարձով է տվել կաթի ֆերմայի աշխատողին, ով դրա փոխարեն կաթ և սերուցք է տալիս նրան, գրում է Metro հրատարակչությունը:
