CNN Türk-ի փոխանցմամբ՝ անգլիական Times թերթում հրապարակվել է Մեծ Բրիտանիայի նախկին արտգործնախարար Ջեկ Ստրոուի «Եվրոպան պետք է գրկի այս ինքնավստահ Թուրքիային» խորագրով հոդվածը, որը նվիրված է հունիսի 12-ին Թուրքիայում կայացած խորհրդարանական ընտրություններին՝ դրանից բխող արդյունքներով.
«Ընտրություններում վարչապետ Էրդողանի հաջողությունը ցույց տվեց, որ ստախոս են այն մարդիկ, ովքեր պնդում են, թե իսլամն ու ժողովրդավարությունն անհամադրելի են։ Թուրքիայում ընտրություններին մասնակցելու ցուցանիշն ամաչեցրեց Մեծ Բրիտանիային։ Վերջին 50 տարիներին մեզ մոտ կայացած ընտրություններում մասնակցության ցուցանիշը չի հասել 80 տոկոսի։
Թուրքիան ցանկանում է անցում կատարել ֆրանսիականի նման նախագահական համակարգի։ Եթե դա տեղի ունենա, ապա Էրդողանն ու Գյուլը փոխատեղում կկատարեն։
Էրդողանը ցանկանում է լավ հարաբերություններ հաստատել Եվրոպայի հետ, սակայն Եվրոպան, ելնելով իր արտաքին անվտանգության ու տնտեսական նկատառումներից, չի ցանկանում Թուրքիան տեսնել իր շարքերում։
Այս ընտրությունների արդյունքում միակ պարտված կողմը ԵՄ-ն է»։
Հիշեցնենք, որ Թուրքիային ԵՄ-ին անդամակցելու թեկնածու երկրի կարգավիճակ շնորհվել է 1999 թվականի դեկտեմբերի 10-ին Հելսինկիում տեղի ունեցած ԵԽ-ի գագաթնաժողովում:
2004 թվականի դեկտեմբերին Բրյուսելում անցկացված ԵԽ համաժողովում միաձայն որոշվեց Թուրքիայի հետ բանակցություններ սկսել 2005 թվականի հոկտեմբերի 3-ին: Այդ օրը ԵՄ անդամ երկրները Լյուքսեմբուրգում երկարատև քննարկումներից հետո ընդունեցին Թուրքիայի հետ բանակցություններ սկսելու որոշում:
Ներկայումս ԵՄ-ին Թուրքիայի անդամակցելու հարցում եվրոպական երկրներին պետք է բաժանել 3 խմբի՝ այդ գործընթացի կողմնակիցներ (Մեծ Բրիտանիա, Իտալիա և այլն), հակառակորդներ (Գերմանիա, Ֆրանսիա, Կիպրոս և այլն) և չկողմնորոշվածներ (Դանիա և այլն):