Грузия Online-ի փոխանցմամբ՝ Կովկասի հարցերով վրաց փորձագետ Մամուկա Արեշիձեն կարծում է, որ պաշտոնական Թբիլիսին պետք է Աբխազիայի նկատմամբ այնպիսի քայլեր իրականացնի, որոնք Աբխազիային կհեռացնեն Ռուսաստանից.
«Այդ պլանում Ռուսաստանն առաջ է ընկել Վրաստանից, ինչի համար էլ պաշտոնական Թբիլիսին պետք է անսպասելի քայլեր կատարի։ Դրանցից մեկը կարող է լինել վրաց-աբխազական ձևաչափի ստեղծման նախաձեռնությունը՝ Աբխազիայի անկախության ճանաչման համար։
Աբխազիայում տիրող իրավիճակը լավատեսության ոչ մի հիմք չի տալիս։ Աբխազները գտնվում են Աբխազիայից վտարվելու և անհետանալու վտանգի տակ։ Աբխազներին պետք է փրկել ձուլումից։ Մենք պետք է հատուկ միջոցներ ձեռնարկենք ոչ թե Աբխազիան, այլ աբխազներին վերադարձնելու ուղղությամբ՝ ծայրահեղ դեպքում նրա համար, որպեսզի կանգնեցնենք նրանց ասիմիլացումն Աբխազիայի տարածքում։
Վրաստանը պետք է Աբխազիայի անկախությունը ճանաչի որոշակի նախապայմաններով, ինչպիսին է, ասենք, փախստականների վերադարձը։
Ես ցանկանում եմ ընդգծել մեկ բան. ավանդական մոտեցումների ժամկետն ավարտվել է։ Մեր մրցակիցը (Ռուսաստան) ունի վիթխարի քաղաքական, դիվանագիտական և ռազմական ռեսուրս ու մեզ գերազանցում է բոլոր գործողություններով։
Ելնելով դրանից՝ մենք պետք է այնպիսի անսպասելի քայլ կատարենք, որը կզինաթափի մրցակցին, այսինքն՝ որոշակի սեպ կխրի նրա ու աբխազների միջև։ Եթե ինձանից կախված լիներ, ապա ես հենց այսօր անկախություն կտրամադրեի Աբխազիային»։
