Այսօր «Ուրբաթ» ակումբում հյուրընկալված «Սասուն» ջոկատի հրամանատար, ԱԺ նախկին պատգամավոր Սասուն Միքայելյանը անդրադարձավ Հայ ազգային կոնգրես-իշխանություն երկխոսության թեմային:
«Ես կողմնակից եմ երկխությանը, քանի որ առաջին անգամ հանրապետությունում ընդդիմություն-իշխանություն ռազմավարություն է ձևավորվել, ինչը ողջունելի է: Բայց երկխոսությունից էլ ես ինչ-որ արդյունքներ չեմ սպասում, սակայն ողջունում եմ: Մարդիկ առաջարկ են արել, որ արտահերթ նախագահական, խորհրդարանական ընտրությունների շուրջը գնանք երկխոսելու: Թող հիմա իշխանական թևը պատասխանի: Երկխոսության ժամանակ ամեն ինչ էլ լինում է: Թող սկսվի, տեսնենք՝ ինչ է լինում: Բայց երկխոսությունից էլ առանձնապես լավ բան չեմ սպասում»,- ասաց նա:
Ս. Միքայելյանը կարծում է, որ կա «առաջին դեմք»՝ Ս. Սարգսյանը, ինքն էլ թող պատասխանի այդ հարցին, իսկ մյուս արտահայտվողները շատ բան կարող են ասել. «Միշտ էլ իշխանությունը մանևրել է, ինչ-որ առումով ցանկացել է խուսափել պատասխանատվությունից: Ինձ թվում է՝ մինչև շաբաթվա վերջը պարզ կլինի իշխանական թևի, այսինքն՝ «առաջին դեմքի» տեսակետը»,- ասաց նա՝ հավելելով, որ Հայաստանը պետք է գնա քաղաքակիրթ ճանապարհով լեգիտիմ ընտրությունների. «Որպեսզի աշխարհին ապացուցենք՝ եթե մտել ենք Եվրախորհուրդ, մենք ընտրել ենք քաղաքակիրթ ճանապարհ: Դրա համար էլ ողջունելի է երկխոսության գաղափարը»:
