«ՅՈՒԿՈՍ» ընկերության նախկին սեփականատեր, ռուսաստանցի գործարար Միխայիլ Խոդորկովսկին, որը հիմա գտնվում է բանտում, պատասխանել է արևմտյան մի շարք պարբերականների, այդ թվում՝ The Wall Street Journal-ի, ֆրանսիակն Le Figaro-ի, իտալական Il Mundo-ի, գերմանական Frankfurter Allgemeine Zeitung-ի հարցերին:
«Մատրոսսկայա տիշինա» բանտից նրա պատասխանները փոխանցվել են գրավոր տեսքով: Իսկ հարցազրույցը նա տվել է մինչև այլ բանտ տեղափոխվելը:
Խոսելով իր ազատման մասին՝ Խոդորկովսկին ասել է, թե այդ գործընթացն իրենից կախված չէ: Նրա ազատմանն, ըստ գործարարի, խոչընդոտում են նրանք, ովքեր իր ձերբակալության շնորհիվ դարձան միլիարդատեր և միլիոնատեր: «Այդ մարդիկ կխոչընդոտեն իմ ազատմանը՝ անկախ նրանից, թե որքան է Վլադիմիր Պուտինը ներգրավված այս հարցում»,- ասել է նա: Նա նաև ավելացրել է, որ ինքը պայքարել է ժողովրդավարության համար և չի ընկրկի՝ անկախ այն պնդումներից, որ եթե նա քիչ հարցազրույցներ տա և ռեժիմի դեմ հայտարարություններ անի, ապա ավելի շուտ կազատվի:
Նա կրկին մեղադրանքներ է ուղղել Պուտինին՝ ասելով, թե, չնայած 11 տարի առաջ վարչապետը հայտարարել էր, որ պայքարելու օլիգարխիայի դեմ, նա միայն պայքարեց իր ընդդիմախոսների դեմ՝ դառնալով իրավական համակարգի Ստալին: Անդրադառնալով Մեդվեդևին, որի մասին ժամանակին դրական էր արտահայտվել, Խոդորկովսկին ասել է, որ նրա ժամանակահատվածում օրենքի գերակայություն այդպես էլ չհաստատվեց:
«Թթու» խոսքեր ուղղվեցին նաև Արևմուտքին. «Արևմուտքում որոշ մարդկանց մոլորությունն այն է, որ կարծում են, թե Ռուսաստանի հետ «ռեալ պոլիտիկով» պետք է զբաղվել՝ հրաժարվելով ժողովրդավարության, սեփականության իրավունքի և օրենքի գերակայության եվրոատլանտյան արժեքներից: Այդպիսի մարդիկ չեն մտածում դրա ծանր հետևանքների մասին կամ հույս ունեն փոխանցել այդ խնդիրների պատասխանատվությունը ապագա սերունդներին»,- ասել է Խոդորկովսկին: Այդուհանդերձ, նա կոչ է արել Ռուսաստանին ընդգրկել Առևտրի միջազգային կազմակերպության մեջ, քանի որ «ռուսաստանցի ժողովուրդը չպետք է տուժի իր իշխանությունների պատճառով»:
Խոդորկովսկին համեմատել է Ռուսաստանն արաբական երկրների հետ, ուր տեղի են ունենում ժողովրդական հուզումներ, հեղափոխություններ՝ ասելով, որ գրեթե նույն խնդիրները կա նաև Ռուսաստանում: Նա նշել է, որ կա նոր սերունդ, որը, ուշ թե շուտ, «ճաշակելու է» այս ռեժիմի բարիքները, որից հետո ոչ մի ուժային այլևս չի կարող պահել երկիրը վերահսկողության տակ:
