Այսօր «Ուրբաթ» ակումբում հյուրընկալվել էր «Սասուն» ջոկատի հրամանատար, ՀՀ ԱԺ նախկին պատգամավոր Սասուն Միքայելյանը։ Անդրադառնալով ղարաբաղյան կարգավորման բանակցային ներկա փուլին՝ նա նշեց, որ կարգավորման հանգուցալուծային տարբերակ չի տեսնում, որովհետև կողմերը համաձայնության չեն եկել, որովհետև ԼՂ-ի կարգավիճակի հարց գոյություն չունի, ուստի, ըստ նրա, խնդիրը չի լուծվի. «Կարող է՝ պայմանավորվածության գան, բայց որոշ ժամանակ մարդկանց տեղյակ չպահեն: Բայց ինձ չի թվում, որ կստորագրեն ինչ-որ փաստաթուղթ: Գուցե ներքին կարգով՝ այո, որովհետև խոշոր տերությունները շահագրգռված են, հավանաբար, պայմանավորվածություն կա»:
Անդրադառնալով հողերի հանձնման մասին խոսակցություններին՝ Սասուն Միքայելյանը նկատեց. «Ես պատերազմ անցած մարդ եմ, մասնակցել եմ բոլոր խոշոր մարտերին: Բնականաբար, ես մի թիզ հող անգամ հանձնելուն դեմ եմ: Ոչ մի կռվող տղա էլ դա չի ցանկանում»: Նա կարծում է, ոչ իշխանությունները չեն կարողանում լուծել ԼՂ կարգավիճակի հարցը. «Ես լավ բան չեմ տեսնում ոչ հօգուտ Հայաստանի, ոչ հօգուտ ԼՂ-ի»: Սասուն Միքայելյանը հավելեց, որ եթե ազատագրված տարածքներն էլ հանձնեն, Ղարաբաղին կարգավիճակ չեն տալու, այդ իսկ պատճառով ինքը որեէ հեռանկար չի տեսնում:
Նախկին քաղբանտարկյալը չբացառեց պատերազմի վերսկսման հավանականությունը՝ միաժամանակ նշելով, որ չնայած հայտարարվում է, թե մենք խնդիրներ չենք ունենա, սակայն դա այնքան էլ այդպես չէ: «Այդտեղ էլ մենք լուրջ խնդիրներ ունենք… Եթե մենք ուզում ենք պատերազմի վերսկսումից խուսափել, պետք է ներքաղաքական խնդիրները կարգավորենք»,- ասաց Միքայելյանը: Նա նշեց, որ Արցախյան պատերազմում հայկական կողմը հաղթել է, որովհետև միասնական էր, բացի այդ՝ Ադրբեջանում վատ էր ներքաղաքական վիճակն այնպես, ինչպես հիմա Հայաստանի ներքաղաքական իրավիճակն է:
Հարցին, թե տարածքներ հանձնելուն դեմ լինելու Միքայելյանի տեսակետը չի՞ հակասում Լևոն Տեր-Պետրոսյանի տեսակետներին, Սասուն Միքայելյանը պատասխանեց. «Ղեկավարի հետ հակասություն չկա, նա ասել է՝ պետք է գնալ փոխզիջման, բայց ես այսօր չեմ տեսնում այդ հնարավորությունը, որ փոխզիջմամբ հնարավոր կլինի լուծել խնդիրը, Ղարաբաղի կարգավիճակի խնդիրը չեմ տեսնում»:
