Թուրքմենիստանում նոր արգելք է մտցվում։ Այս անգամ՝ հագուստի սահմանափակում։ Երկրում արգելել են կանացի բիկինի լողազգեստների և շորտերի (և կանացի, և տղամարդու) ներմուծումը։ Մասնավոր խանութները վաճառում են այն, ինչ մնացել է պահեստներում։ Տեղի բնակչուհիները շտապում են գնումներ կատարել՝ քանի դեռ հնարավորություն կա։
«Մաքսատանը թույլ չեն տալիս լողազգետներ և շորտեր անցկացնել։ Մաքսատան աշխատակիցները չեն բացատրում արգելքի պատճառը»,– հայտարարում է թուրքմենական ռադիոյի թղթակիցը։
Մաքսատան աշխատակիցները ոչ պաշտոնապես ենթադրում են, որ արգելքը կարող է կապված լինել «թուրքմենների բարոյական նորմերի հետ»։
Անցյալ ամսվա վերջին հայտնի դարձավ, որ Աշխաբադի պետական հաստատությունների աշխատակցուհիներին թույլ չեն տալիս ներկել և աճեցնել եղունգները, թարթիչները երկարեցնել, ինչպես նաև գունաթափել մազերը և ոսկյա զարդեր կրել։
Ընդ որում, Թուրքմենիստանի նախագահ Գուրբանգուլի Բերդիմուհամեդովը մշտապես ներկում է մազերը։