«ՖՈՒՏԲՈԼ 365» շաբաթաթերթը հարցազրույց է արել Europian Sport Agency ընկերության գործակալ Վալերի Հովհաննիսյանի հետ, որը Ռուբեն Հայրապետյանի խնդրանքով մեկնել է Ամստերդամ և պայմանավորվել «Այաքս»-ի ֆուտբոլիստ Արազ Օզբիլիսի հետ: Ստորև ներկայացնում ենք ամբողջական հարցազրույցը:
– ՀՖՖ նախագահ Ռուբեն Հայրապետյանի հետ զրույցից հետո ես մեկնեցի Ամստերդամ՝ հանդիպելու Օզբիլիսին: Մենք նրա հետ հանդիպել ենք երկու անգամ, վերջինը` երկու շաբաթ առաջ: Արազը հաստատեց, որ ընդունում է Լիտվայի թիմի հետ խաղին Հայաստանի հավաքականի հրավերը: Եթե նրա խաղը բավարարի մարզիչներին, իսկ նրան դուր գա իրավիճակը թիմում, նա կհամաձայնի հանդես գալ մեր ազգային հավաքականում:
– Մինչև Ձեր հանդիպումը Օզբիլիսի հետ նրա մոտ Ամստերդամ էին մեկնել Վարդան Մինասյանը և ֆուտբոլի ֆեդերացիայի ներկայացուցիչները: Ձեզ ինչպե՞ս հաջողվեց համոզել Արազին:
– Նրան համոզելու հարկ չեղավ: Մենք պարզապես զրուցեցինք: Երբ Օզբիլիսի մոտ էր գնացել Վարդան Մինասյանը, հենց այդ ժամանակ նա սկսել էր հաճախ խաղալ «Այաքս»-ի հիմնական կազմում: Տեղի մարզիչները` նույն Ֆրանկ դե Բուրը, Արազին համոզել էին, որ չընդունի Հայաստանի հրավերը, որպեսզի կարողանա դուրս գալ Հոլանդիայի հավաքական:
– Իսկ ի՞նչ է փոխվել այդ ժամանակից:
– Արազը լավ մտածել էր և հասկացել, որ Հոլանդիայի հավաքական ընկնելը նրա համար շատ բարդ կլինի: Եթե խաղա Հոլանդիայի երիտասարդական հավաքականում, նրա շանսերը վատ չեն, բայց հիմնականում շատ ուժեղ մրցակցություն է: Հոլանդական տարբերակը նրան հրապուրել էր այնքանով, որ հավաքական հրավիրվելու դեպքում երաշխավորված կմասնակցեր աշխարհի և Եվրոպայի առաջնություններին: Բայց ես նրան համոզեցի, որ եթե նա և սփյուռքի մեր մյուս հայրենակիցները համաձայնեն խաղալ Հայաստանի հավաքականում, ապա մեր ազգային թիմը դուրս կգա Եվրոպայի կամ աշխարհի առաջնություն:
– Արազը հետևո՞ւմ է Հայաստանի հավաքականի խաղերին:
– Այն բանից հետո, երբ մեր մարզչական շտաբը սկսեց հետաքրքրվել նրանով, Օզբիլիսը սկսել է ուշադիր հետևել Հայաստանի հավաքականին: Նա հրաշալի հասկանում է, որ մեր թիմն առաջադիմում է, և դադարել է հետնապահ լինելուց: Արազը նույնպես այն կարծիքին է, որ Հայաստանի հավաքականը լավ ապագա ունի:
– Իսկ ի՞նչ հարցեր են նրան ամենաշատը հետաքրքրում:
– Նա շատ է հարցնում Հայաստանի մասին, ֆուտբոլի զարգացման մասին, թիմում իրավիճակի մասին: Ես նրան ուղիղ հարցրի. «Գուցե դու հայերի հետ չե՞ս հարմարվի»: Նա անմիջապես արձագանքեց. «Չէ, ինչ ես ասում: Ախր ես հայ եմ»: Եվ ցույց տվեց ինչ-որ դաջվածք, որտեղ գրված էր. «Ես հայ եմ»:
– Ռուբեն Հայրապետյանն ասել է, որ Խոակին Բոգոսյանը փող է ուզել Հայաստանի հավաքականի կազմում ելույթի համար: Օզբիլիսն այդպիսի պահանջ չի՞ դրել:
– Չէ: Ստուգելու համար ես դա ակնարկեցի: Նա ասաց, որ փողի մասին խոսք չի կարող լինել: Նրան հետաքրքրում են միայն մարզական բաղադրիչները:
– Թուրքիայի հավաքականը նույնպե՞ս ցանկացել է նրան ձեռք բերել:
– Այո, ցանկացել է: Թուրքական ֆեդերացիայի ներկայացուցիչները մեկ կամ երկու անգամ չէ, որ դուրս են եկել նրա վրա: Բայց Արազն ինձ հետ զրույցում հաստատեց, որ Թուրքիայի հավաքականում ելույթ ունենալու մասին խոսք լինել չի կարող: Նա տառացիորեն ասաց հետևյալը. «Ես երբեք չեմ խաղա այդ դրոշի տակ: Թուրքիայում բոլորը գիտեն, որ ես հայ եմ, և հասկանում են, որ չեմ համաձայնի նրանց թիմում խաղալ»:
– Բայց վերջերս նրան ցանկացել է ձեռք բերել թուրքական «Բուրսասպոր»-ը…
– Այո, նրանք առաջարկով դիմել են «Այաքս»-ին, բայց Արազը չի ցանկացել տեղափոխվել թուրքական առաջնություն:
– Ստացվում է, որ Հայաստանի հավաքականում խաղալ-չխաղալու վերջնական որոշումը նա կընդունի Լիտվայի խաղից հետո՞:
