Թուրքական Hürriyet թերթի փոխանցմամբ՝ Սիրիայում ժողովրդական հուզումների բռնկումից հետո սիրիացի առաջին բարձրաստիճան պաշտոնյան այսօր այցելելու է Թուրքիա։ Խոսքը Սիրիայի արտգործնախարար Վալիդ Մուալիմի մասին։
Նշվում է, որ Մուալիմն իր հետ բերում է Թուրքիայի վարչապետ Էրդողանին հասցեագրած` Սիրիայի նախագահ Բաշար Ասադի հատուկ ուղերձը։ Նրա հետ միասին Թուրքիա է ժամանում Ասադի հատուկ ներկայացուցիչ Հասան Թյուրքմանը, որին տեղական ժամանակով ժամը 16:00-ին իշխող «Արդարություն ու զարգացում» կուսակցության (ԱԶԿ) կենտրոնական գրասենյակում ընդունելու է Էրդողանը։
Հիշեցնենք, որ վերջին շրջանում որոշակի լարվածություն է տիրում թուրք-սիրիական հարաբերություններում։ Երեկ Էրդողանն ու Ասադը հեռախոսազրույց են ունեցել, որի ընթացքում Էրդողանն անհանգստություն է հայտնել Դամասկոսում գտնվող Թուրքիայի դեսպանատան և Հալեպում գտնվող Թուրքիայի հյուպատոսարանի առջև տեղի ունեցած բողոքի ակցիաների, ինչպես նաև սիրիական մամուլում հակաթուրքական հրապարակումների ավելացման կապակցությամբ։
Ի դեպ, Սիրիայում և Լիբիայում տիրող իրավիճակը քննարկելու համար այսօր Անկարայում տեղի է ունենալու մերձավորարևելյան գագաթնաժողով, որին մասնակցելու են մի շարք երկրներից (ԱՄՆ, Մեծ Բրիտանիա, Ֆրանսիա, Ռուսաստան) հրատապ հետ կանչված թուրք դեսպաններ, ինչպես նաև ՆԱՏՕ-ում ու ՄԱԿ-ում Թուրքիայի մշտական ներկայացուցիչները (ընդհանուր առմամբ 27 մարդ)։ Այդ գագաթնաժողովը նախագահելու է Թուրքիայի արտգործնախարար Ահմեդ Դավութօղլուն։