Թուրքական Cumhuriyet թերթի փոխանցմամբ՝ քրդական «Խաղաղություն և ժողովրդավարություն» կուսակցության (ԽԺԿ) փոխնախագահ Ֆիլիզ Քոչալին Դիարբեքիրում անդրադարձել է կիրակի օրը Թուրքիայում կայացած խորհրդարանական ընտրություններին.
«Ընտրությունների ժամանակ ԽԺԿ-ի ստացած քվեները վկայում են խորհրդարան մուտք գործելու համար սահմանված 10 տոկոսանոց նախընտրական շեմի անիմաստության մասին։
Խորհրդարանում 36 պատգամավորի առկայությունը փլուզեց այդ 10 տոկոսանոց շեմը։ Ոչ մի շեմ կամ արգելք ի վիճակի չէ կանգնեցնել ժողովրդի կամքը, ինչն ապացուցվեց հերթական անգամ։
Իշխող «Արդարություն և զարգացում» կուսակցությունը (ԱԶԿ) նահանջ է ապրել այս տարածաշրջանում։ Քուրդ ժողովուրդը մերժեց ԱԶԿ-ի գերիշխանությունը»։
Հիշեցնենք, որ Թուրքիայում գործող նախընտրական 10 տոկոսանոց շեմն ամենաբարձր ցուցանիշն է ԵԽ-ի անդամ 47 երկրներում։ Այդ համակարգի ներդրման հիմնական պատճառը խորհրդարանում քրդերի ներկայության բացառումն է։
2002 թվականի նոյեմբերի 3-ի ընտրություններում քրդերը հանդես եկան միացյալ կուսակցությամբ («Դեմոկրատական ժողովուրդ» կուսակցություն), սակայն պարտություն կրեցին՝ ստանալով քվեների 6.21 տոկոսը։ Իսկ 2007 թվականի հուլիսի 22-ի վաղաժամ ընտրություններում քրդերը հանդես եկան անկախ թեկնածուներով, ինչի շնորհիվ խորհրդարանում ստացան 21 մանդատ (անկախ թեկնածուների 26 մանդատից)՝ ձևավորելով «Դեմոկրատական հասարակարգ» խմբակցությունը։
Հատկանշականն այն է, որ 2007 թվականի ընտրություններում քրդաբնակ այն շրջաններում, որոնցում քուրդ անկախ թեկնածուները պարտություն էին կրել կամ էլ ընդհանրապես չէին առաջադրել իրենց թեկնածությունը, ԱԶԿ-ն հավաքել էր քվեների 60 տոկոսից ավելին։ Դա պայմանավորված էր նրանով, որ քրդերը, հայերի նման, նախընտրում են իրենց համար չարյաց փոքրագույնը։
Սակայն դրանից հետո ԱԶԿ-ի խոստացած «քրդական» բարեփոխումները մնացին թղթի վրա, և փոխարենը ուժեղացվեցին քրդերի նկատմամբ գործադրվող բռնություններն ու ճնշումները, ինչն էլ հանգեցրեց քրդերի շրջանում ԱԶԿ-ի վարկանիշի անկմանը։