Այսօր Եվրանեսթի ԽՎ-ում ՀՀ ԱԺ պատվիրակության և Հայաստանի Արևելյան գործընկերության քաղաքացիական հասարակության ֆորումի ընթացքում Եվրանեսթում հայաստանյան պատվիրակության ղեկավար, ԱԺ ՀՅԴ խմբակցության ղեկավար Վահան Հովհաննիսյանը հայտարարեց, որ իրենք միշտ բաց են աշխատելու, և հասարակական կազմակերպությունների հետ նման ֆորումները հենց այդ նպատակն ունեն: Նա ընդգծեց, որ Եվրանեսթում հայաստանյան պատվիրակությունը քննարկելու և ընդունելու է հասարակական սեկտորի կողմից եղած առաջարկությունները և ընդունելու է անհրաժեշտները:
Վահան Հովհաննիսյանը նկատեց, որ բոլոր քննարկումներին լրաատվամիջոցները հրավիրված են եղել, ու լինելու են, և խնդրեց, որ լրատվամիջոցները չփորձեն սխալ գնահատականներ տալ իրենց աշխատանքին: Նա անդրադարձավ լրատվամիջոցներից մեկում երեկ եղած այն հրապարակմանը, թե Վահան Հովհաննիսյանը դժգոհ է պատվիրակության որոշ անդամների լեզվի չիմացությունից և դիմել է ԱԺ նախագահին նրանց փոխարինելու պահանջով:
«Գրված էր, թե իբր ես նամակ եմ ուղարկել ԱԺ նախագահին, որում եղել են դժգություններ մեր պատվիրակության կազմից, ունակություններից, լեզվի իմացությունից։ Եթե ես ունենամ պրոբլեմ և դժգոհություն, առաջին հերթին կհայտնեմ պատվիրակության կազմի իմ կոլեգաներին, այլ ոչ թե գրավոր կհայտնեմ այստեղ կամ այնտեղ, կամ էլ ինչ-որ անհայտ աղբյուրների»,- մանրամասնեց Հովհաննիսյանը և հավելեց. «Պետք չէ սկանդալ որոնելով՝ խանգարել մեզ»: