ՄԱԿ-ում Վրաստանի նախկին դեսպան, «Մեր Վրաստանը-Ազատ դեմոկրատներ» ընդդիմադիր կուսակցության առաջնորդ Իրակլի Ալասանիան ԱՄՆ-ում քննարկում է Վրաստանի ընտրական գործընթացների հետ կապված հարցեր: Այս մասին տեղեկատվություն է տարածել կուսակցության մամուլի ծառայությունը,- հայտնում են վրաստանյան գործակալությունները: Ալասանիան հանդիպումներ է անցկացրել Ազգային-ժողովրդավարական ինստիտուտում և Ժողովրդավարության ազգային հիմնադրամում: «Վաշինգտոնը մեծ ուշադրություն է դարձնում այն բանին, թե Վրաստանը որքան ժողովրդավարականորեն կանցկացնի հաջորդ ընտրությունները: ԱՄՆ-ում ակնկալում են, որ ընտրությունների ազատ համակարգի ստեղծումից հետո Վրաստանում առաջին անգամ իշխանափոխություն տեղի կունենա խաղաղ ճանապարհով»,- հայտարարել Է Ալասանիան՝ ամփոփելով հանդիպումների արդյունքները: ԱՄՆ Ալասանիայի ուղևորության ծրագրով այս շաբաթ նախատեսված է նրա ելույթը Ջորջ Վաշինգտոնի համալսարանում և հանդիպումներ ԱՄՆ նախագահի՝ Եվրոպայի և Ռուսաստանի հարցերով խորհրդականների հետ: Ալասանիայի ուղևորությունը ԱՄՆ կտևի մինչև նոյեմբերի 23-ը:
