Ընկերվար միջազգայնականի (Սոցինտերն) խորհրդի՝ նոյեմբերի 15-16-ը Փարիզում կայացած ժողովը բանաձև է ընդունել Լեռնային Ղարաբաղի հակամարտության մասին:
Հայ հեղափոխական դաշնակցության մամլո դիվանի փոխանցմամբ` բանաձևում, մասնավորապես, ասված է. «Առաջնորդվելով այս տարի Երևանում և Բաքվում գումարված ժողովների արդյունքներով, որտեղ մեր անդամ կուսակցությունների հայ և ադրբեջանցի ներկայացուցիչները կարողացան աննախընթաց երկխոսություն ունենալ Լեռնային Ղարաբաղի հարցի շուրջ, գնահատում ենք անդամ կուսակցությունների, Հայաստանի և Ադրբեջանի կառավարությունների` մյուս երկրից Ընկերվար միջազգայնականի անդամ կուսակցությունների պատվիրակներին հյուրընկալելու փաստը՝ համարելով շատ դրական երևույթ։ Մենք այժմ տեսնում ենք հնարավորություն և անհրաժեշտություն, օգտվելով առկա հիմքերից, երկխոսություն և վստահություն կառուցելու»։
Խիստ կարևորելով Ղարաբաղյան հակամարտության կարգավորումը տարածաշրջանում խաղաղություն և կայունություն հաստատելու համար` Սոցինտերնը, «որ խաղաղության իր նախաձեռնությամբ է հանդես եկել, իր ճիգերի ներածի չափով շարունակելու է ներդրում ունենալ առաջընթացը պահպանելու և շարունակելու գործում` ա) Լեռնային Ղարաբաղի կարգավիճակի պաշտոնականացնել և սահմանել տարածաշրջանի համար բոլորի կողմից ընդունելի վերջնական կարգավիճակ, բ) հաստատել երկու կողմից տեղահանված անձանց իրավունքները, գ) կոչ անել՝ հարգել 1994 թ. զինադադարի պայմանագիրը և հետ կանգնել զինադադարի բոլոր տեսակի խախտումներից, ներառյալ` դիպուկահարների կրակից, դ) կոչ անել կողմերին՝ հակամարտության գլխավոր հարցը կարգավորելու համար ցուցաբերել քաղաքական կամք հասնելու համար համարժեք, հավասարաչափ և միաժամանակյա փոխզիջումների»,- ասված է բանաձևում:
Ժողովին մասնակցած Դաշնակցության պատվիրակության կազմում էին կուսակցության բյուրոյի անդամ, Սոցինտերնի ԱՊՀ-ի, Կովկասի և Սև ծովի հանձնախմբի համանախագահ Մարիո Նալբանդյանը, Դաշնակցության Հայաստանի գերագույն մարմնի ներկայացուցիչ Արմեն Ռուստամյանը, բյուրոյի անդամ Լևոն Մկրտչյանը, Արևմտյան Եվրոպայի կենտրոնական կոմիտեի համանախագահներ Մուրադ Փափազյանն ու Ռիշար Անանյանը, այլ գործիչներ։