Թուրքական Radikal թերթի փոխանցմամբ, օգոստոսի 22-ից Թուրքիայում ինտերնետային սահմանափակումների ներդրման դեմ հանդես եկող Anonymous (Anonim) հաքերային խումբը հայտարարություն է տարածել՝ խոստանալով այս գիշեր նորից անցնել գործի.
«Մի շարք տեղական և օտար լրատվամիջոցներ տեղեկատվություն են տարածել, թե Թուրքիայում ձերբակալվել են մեր խմբի մի շարք (32) անդամներ։ Այսպիսի կեղծիքներ տարածելու համար մենք այս գիշեր նոր քիբերհարձակում կիրականացնենք, որը կլինի առավել բարձր մակարդակում, քան նախորդ անգամ։ Սակայն մինչև վերջին պահը մենք չենք հրապարակի մեր թիրախները։ Միայն կասենք, որ որոշել ենք չհարձակվել քաղաքական կուսակցությունների և լրատվամիջոցների կայքերի վրա»։
Հիշեցնենք, որ օրեր առաջ Թուրքիայի պաշտոնական կառույցների կայքերը հարձակման էին ենթարկվել («Թուրքիա. օպերացիա») Anonymous-ի կողմից։ Վերջինիս թիրախում էր հայտնվել տեղեկատվական և հաղորդակցային տեխնոլոգիաների դեպարտամենտը, որը նախաձեռնել է ինտերնետային սահմանափակումներ մտցնելու գործընթացը։
Չնայած վերջինիս ձեռնարկած հակաքայլերին, որոշ ժամանակ անց դեպարտամենտի գլխավոր էջն օգտատերերի համար դարձել է անհասանելի։
Քիչ անց նույն ճակատագրին են արժանացել նաև մի շարք այլ պետհիմնարկների կայքեր։
Մտավախություն կար, որ Anonymous-ը կարող էր հունիսի 12-ին շարքից հանել նաև Թուրքիայի Կենտրոնական ընտրական հանձնաժողովի համակարգչային ցանցը, սակայն, հաքերները, հերքեցին դա։