Այսօր լրագրողների հետ հանդիպման ժամանակ ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը նշեց. «Կազանում նախագահների հանդիպումից ակնկալվում է դրական եզրակացություն, այսինքն՝ կողմերը կասեն, որ լավ է, բայց լուրջ առաջընթաց չի լինի»։
Անդրադառնալով այն լուրերին, թե հնարավոր է՝ Կազանում ձեռք բերվի պայմանագրի արժեք ունեցող բանավոր պայմանավորվածություն՝ Մանոյանը ասաց. «Չեմ պատկերացնում բանավոր պայմանավորվածություն։ Գուցե կբանակցեն տարբեր հարցերի մասին, սակայն բանավոր փաստաթուղթը չի նշանակում փաստաթուղթ ստորագրել»։ Ըստ նրա՝ պայմանավորվածությունները պետք է լինեն պատերազմը կանխելու համար։
Անդրադառնալով ԼՂ հարցին՝ նա նշեց, որ, հակառակ միջազգային լրատվամիջոցների ակնկալիքների, հիմք չկա ասելու, որ մինչև ամսի 25-ը բարեփոխման առաջընթաց կնկատվի. «Ճիշտ է, որ միջազգային համայնքը ինչ-որ չափով մեծացրել է ճնշումը կողմերի վրա, բայց չեմ կարծում, որ դա կվերածվի պարտադրանքի, որ կողմերը, առանց իրենց ցանկության, պարտադրվեն ինչ-որ բաներ ստորագրել։ Միջնորդները փորձում են ստեղծել մթնոլորտ, որ իբր պիտի այս մթնոլորտի ճնշման տակ կողմերը ինչ-որ բաների համաձայնեն, բայց կարծում եմ, Ադրբեջանն իր կեցվածքը չի փոխի գոնե մինչև ամսի 25-ը։ Իրենք շարունակում են հայտարարել, որ իրենց համար կարգավիճակի կարգավորումն այն է, որ Ղարաբաղը պիտի ունենա ընդամենը լայն ինքնավարություն Ադրբեջանի կազմում, ինչն արդեն նշանակում է անհեռանկար լուծում. «Իսկ եթե իրենց կողմից ինչ-որ չափով արտահայտությունները դրական են հնչում, նույնն է, որ փոխանակ ասեն բաժակի կեսը դատարկ է, ասում են կեսը լիքն է։ Սա նրա համար է, որ նրանք ուզում են ՄԱԿ-ի անդամ լինել»։
Անդրադառնալով հայ-թուրքական արձանագրությունների վավերացմանը՝ Կ.Մանոյանը երկու հարց առանձնացրեց. «Նախ՝ մեզ մոտ սկսեց հնչել տեսակետ, որ Ղարաբաղի հարցում ինչ-որ առաջընթաց կգործածվի Թուրքիայի կողմից, որպեսզի Հայաստանի հետ հարաբերություններ հաստատվեն։ Մյուս հարցն այն է, որ կարող է արձանագրություններից մեկը վավերացվի, չնայած երկուսն էլ իրար լրացնում են։ Երկու դեպքում էլ հիմք չկա «լավատես» լինելու։ Այն, թե Ղարաբաղի հարցը կարող է ինչ-որ առաջընթաց ծառայել, կարծում եմ, այդքան էլ պարզ չէ այն իմաստով, որ Ադրբեջանը կոշտ քաղաքականություն է վարում, և որ Էրդողանը հայտարարել է, որ ինչ-որ բան չի փոխվելու։ Անհրաժեշտ է վայրկյան առաջ այդ արձանագրությունների տակից Հայաստանի ստորագրությունները հետ կանչել»։