«Սարդարապատ» շարժման անդամ Տիգրան Խզմալյանը այսօր լրագրողների հետ հանդիպման ժամանակ ներկայացրեց իր և շարժման անդամ Գարեգին Չուգասզյանի՝ ԱՄՆ կատարած այցի մանրամասները։
«Մենք ներկայացնում ենք ԱՄՆ կատարած մեր այցերը, որովհետև մեր օրերում քաղաքական դաշտում շատ գործընթացներ կատարվում են գաղտնի»,- ասում է Տիգրան Խզմալյանը։
«Այցը բաղկացած էր երկու մասից, նախ այցելել ենք Վաշինգթոն և հանդիպել տարածաշրջանով, Միջին Արևելքով զբաղվող քաղաքագետների հետ։ Հանդիպումներ ենք ունեցել ժողովրդավարության հիմնադրամի, Քարնեգիի հիմնադրամի, Freedom House-ի ներկայացուցիչների հետ։ Ներկայացրել ենք Հայաստանում քաղաքացիական հասարակության կայացման մասին մեր պատկերացումները»,- պատմում է Խզմալյանը։
Գարեգին Չուգասզյանը և Տիգրան Խզմալյանը իրենց վերլուծությունները ներկայացրել են՝ զուգահեռներ անցկացնելով Վրաստանում ներկա իրավիճակի, Միջին Արևելքի հեղափոխությունների և հայաստանյան ներքաղաքական զարգացումենրի միջև։ Ի վերջո, Տիգրան Խզմալյանը ներկայացնում է այն եզրահանգումը, որ ավտորիտար համակարգերը սպառել են իրենց, և դա է պատճառը, որ Հայաստանում նույնպես «ավտորիտար միջոցներով լեզու գտնելու փորձեր անող երկու վերնախավերի գործարքը տապալվելու է»։
«Սարդարապատ»-ի նախաձեռնող խմբի անդամները Վաշինգթոնում այցելել են նաև Վուդրո Վիլսոնի շիրիմին՝ համոզված լինելով, որ Հայաստանի համար անխուսափելի են այն զարգացումները, որոնք տեղի ունեցան դարասկզբին, և որում մեծ դեր ունեցավ Վիլսոնի քաղաքականությունը։
Խզմալյանը ԱՄՆ այցը կարևորում է նրանով, որ դրա ընթացքում իրենք նոր փաստեր հաղորդեցին ԱՄՆ փորձագետներին, ովքեր սիրում են լսել ճշմարտությունը և գնահատում են անկեղծությունը, քանի որ հաճախ ապատեղեկատվություն է տարածվում այստեղից։
Լոս Անջելեսում հանդիպել են հայ համայնքի ներկայացուցիչների հետ և քննարկել հիմնականում մշակութային թեմաներ։ ԱՄՆ հայկական հեռուստաալիքներով ցուցադրվել է Գարեգին Չուգասզյանի հեղինակած ֆիլմը՝ նվիրված Կոմիտասին, ինչպես նաև ցուցադրվել են Տիգրան Խզմալյանի մի քանի ֆիլմերը։
