«Հետաքրքիր է, որ Երևանից, Բաքվից, Փարիզից և մեկ այլ տեղից հնչող հայտարարությունները մինյանց նման են, և բոլորը խոսում են, որ Կազանում առաջընթաց է լինելու»,- լրագրողների հետ հանդիպման ժամանակ նշեց տարածաշրջանային հետազոտությունների կենտրոնի ղեկավար Ռիչարդ Կիրակոսյանը՝ անդրադառնալով ԼՂ հարցի շուրջ վերջին զարգացումներին:
Կիրակոսյանը նկատեց, որ հիմա բոլորն էլ մտահոգ են պատերազմի վերսկսման հավանականությամբ, և այժմ Մինսկի խումբը ցանկանում է ճնշումներ գործադրել, որպեսզի Ադրբեջանը դադարեցնի իր ռազմական հռետորությունը:
Կազանյան հանդիպման մասին խոսելով՝ Կիրակոսյանը նկատեց, որ որևէ առաջընթաց այնտեղ չի լինի, սակայն միջնորդները արձանագրելու են, որ եղել է առաջընթաց, քանզի դա իրենց պետք է. «Նման հանդիպումների կայացման ժամանակ երկու շատ կարևոր համաձայնություն միշտ էլ լինում է. Առաջին՝ նախագահները միշտ համաձայնություն գտնում են ինչ խմել՝ թեյ թե սուրճ, և երկրորդ՝ որ աթոռին պետք է նստեն: Ահա այսքանն է կողմերի համաձայնությունն ու արձանագրվող առաջընթացը»:
