Խամովնիչեսկի դատարանի աշխատակցուհի Նատալյա Վասիլևայի կողմից քննչական վարչություն բերված փաստաթղթերը վկայում են այն մասին, որ սկզբում հայտնի գործարար Միխայիլ Խոդորկովսկու գործով դատավոր Վիկտոր Դանիլկինն իրականում ավելի մեղմ դատավճիռ էր պատրաստում՝ 10 տարի, ներկայիս 14-ի փոխարեն:
«Այսօր Խամովնիչեսկի դատարանի նախկին մամուլի խոսնակ Նատալյա Վասիլևան քննչական ծառայությունում հարցաքննության ժամանակ գեներալ-մայոր Ալեքսանդր Դրիմանովին ներկայացրել է երեք էջ, որտեղ, ինչպես նա պնդում է, նշված են Դանիլկինի կողմից Միխայիլ Խոդորկովսկու և Պլատոն Լեբեդևի գործով գրված, բայց չհրապարակված դատավճիռը»,- ասվում է «Ագորա» ընկերակցության հայտարարության մեջ:
Նատալյա Վասիլևան Gazeta.ru-ին տված հարցազրույցում ասել է, որ դատավոր Դանիլկինն իր վճիռը կայացրել է Մոսկվայի քաղաքային դատարանի ճնշման ներքո: Ավելի ուշ Մոսկվայի քաղաքային դատարանը հերքել էր Վասիլևայի այս հայտարարությունը: