ՀՀ սպորտի և երիտասարդության հարցերի փոխնախարար Արսեն Քարամյանը այսօր լրագրողների հետ հանդիպման ժամանակ տեղեկացրեց, որ ՀՀ սպորտի և երիտասարդության հարցերով նախարարության, ֆինանսների նախարարության և Կենտրոնական բանկի հետ համատեղ մշակված տարբերակով նախաձեռնել են «Երիտասարդ ընտանիքների աջակցման ծրագրում» կատարել մի քանի փոփոխություներ: Հստակեցվել են որոշակի հասկացություններ, թե ինչ ասել է՝ միայնակ ծնող, երիտասարդ ընտանիք: Փոփոխության արդյունքում ՀՀ ոչ քաղաքացին, որը ամուսնացած է ՀՀ քաղաքացու հետ, ևս կարողէ դառնալ ծրագրի շահառու: Եթե սույն թվականի հունվարի 29-ի որոշմամբ սահմանվում էր, որ վերջնական վարկի տոկոսադրույքը չի կարող տարեկան 9 տոկոսից ավել լինել, ապա այսօր մարզաբնակ երիտասարդ ընտանիքների համար առավելագույն տոկոսադրույքը տարեկան սահմանվել է մինչև 7.5 տոկոս: «Այսինքն՝ եթե քաղաքաբնակ ընտանիքների համար պետության սուբսիդավորման մասը 2 տոկոս էր սահմանված, ապա մարզաբնակների համար սուբսիդավորումը սահմանվում է 4 տոկոս: Այս պահի դրությամբ, ֆինանսավորում է ստացել 175 ընտանիք: Շուրջ 30 վարկային փաթեթներ գտնվում են քննարկման մեջ, և առաջիկա 15 օրվա ընթացքում դրանց ճնշող մեծամասնությունը կբավարարվի: Նրանց բացարձակ մեծամասնությունը երևանաբնակներ են: Ընդամենը 10 տոկոսն են մարզերից»,- նշեց փոխնախարարը և ավելացրեց, որ կանխավճարի չափը Երևանում շարունակում է մնալ 30 տոկոս, իսկ գյուղերում կանխավճարը կլինի 10 տոկոս, սակայն՝ եթե հավելյան գույք գրավ դնեն: Բնակարան ձեռք բերելու գումարային առավելագույն շեմը լինելու է 16 միլիոն դրամ, այսինքն՝ շուրջ 44 հազար դոլար: Արսեն Քարամյանի խոսքերով՝ պարտադիր չէ, որ երիտասարդ ընտանիքները շքեղ բնակարաններ ձեռք բերեն, որովհետև գործ ունենք սոցիալական ծրագրի հետ: Իսկ այն հարցին ի պատասխան, թե որո՞նք են համարվում երիտասարդ ընտանիքներ, պարզաբանեց. «Նրանց հանրագումարային տարիքը չպետք է գերազանցի 60 տարեկանը: Ընդ որում՝ ամուսիններից մեկի տարիքը չպետք է գերազանցի 35 տարեկանը»: